ބައިނަލްއަޤުވާމީ ޖިނާއީ ކޯޓު (އައި.ސީ.ސީ.) ގެ ފަނޑިޔާރުންނަށް އެމެރިކާއިން ދަތިކުރުމުގެ ފިޔަވަޅު އެޅުމާއި ގުޅިގެން، 48 ޤައުމަކުން އެމެރިކާ އާއި ދެކޮޅަށް ތެދުވެ، އެ ޢަމަލު ވަރަށް ބޮޑަށް ކުށްވެރިކޮށް، އެއީ ބައިނަލްއަޤުވާމީ ޢަދުލުގެ ނިޒާމަށް ދެވުނު ހަމަލާއެއް ކަމަށް ސިފަކޮށްފިއެވެ.

އެމެރިކާއާއި ދެކޮޅަށް މިކަމުގައި ތެދުވި ޤައުމުތަކުގެ ތެރޭގައި، ފްރާންސް، ޖަރުމަން، އިނގިރޭސިވިލާތް، ކެނެޑާ، އަދި ދެކުނު އެފްރިކާ ހިމެނެއެވެ. ޖުމްލަ 48 ޤައުމުން އިއްޔެ ނެރުނު ބަޔާނެއްގައި ވަނީ، ޓްރަމްޕް ސަރުކާރުން އައި.ސީ.ސީ.ގެ ހަތަރު ފަނޑިޔާރަކަށް އަމާޒުކޮށް އަޅާފައިވާ ދަތިކުރުމުގެ ފިޔަވަޅުތަކަށް ވަރަށް ބޮޑަށް ފާޑުކިޔާފައެވެ. މިފަނޑިޔާރުންނަކީ، އަފްޣާނިސްތާނުގައި އެމެރިކާގެ ސިފައިން ހިންގާފައިވާ ކަމަށް ބެލެވޭ ހަނގުރާމައިގެ ޖަރީމާ ތަކާއި، ފަލަސްތީނުގައި ހައްދުފަހަނަ އެޅި ޒައެނިސްޓް އިސްރާއީލުގެ ސިފައިން ހިންގާފައިވާ ކަމަށް ބެލެވޭ ކުށްތަކާއި ގުޅޭ ތަޙްޤީޤުތަކުގައި ބައިވެރިވާ ފަރާތްތަކެވެ.

ބައިނަލްއަޤުވާމީ ޖިނާއީ ކޯޓަށް ފުރިހަމަޔަށް އެއްބާރުލުން ދޭނެ ކަމަށް، މި 48 ޤައުމުން ވަނީ އެމީހުންގެ ބަޔާނުގައި ބުނެފައެވެ. އަދި އެ ކޯޓަށް ފުރިހަމަ ތާއީދު ކުރާ ކަމަށާއި އެ ކޯޓުގެ ފަނޑިޔާރުންނަށް މިނިވަންކަން އޮންނަން ޖެހޭ ކަމަށް އެ ޤައުމުތަކުން ބުންޏެވެ.

އެމެރިކާގެ މިފަދަ ފިޔަވަޅުތަކުގެ ސަބަބުން ބައިނަލްއަޤުވާމީ ޤާނޫނުގެ ވެރިކަން ނިޒާމު ނިތާލައި، ހަނގުރާމަވެރި ކުށްތަކަށް އަރައިގަންނަ ފަރާތްތަކަށް ހިތްވަރު ލިބިދާނެ ކަމަށް ބައިނަލްއަޤުވާމީ ޤާނޫނީ މާހިރުން ވަނީ އިންޒާރު ދީފައެވެ.

ނެދަލޭންޑްސްގެ ދަ ހޭގްގައިވާ އައި.ސީ.ސީ. އުފައްދާފައިވަނީ، ނަސްލީ ކުށްތަކާއި، އިންސާނިއްޔަތާއި ޚިލާފު ކަންކަމާއި ޖަރީމާތަކާއި، އަދި ހަނގުރާމަވެރި ކުށްތަކާއި ޖަރީމާތަކަށް ޖަވާބުދާރީކުރުމަށްޓަކައެވެ.

ޓްރަމްޕުގެ ސަރުކާރުން ބުނަނީ އައި.ސީ.ސީ އަކީ "ސިޔާސީ ވެފައިވާ މުއައްސަސާއެއް ކަމަށް ސިފަކޮށް އައި.ސީ.ސީ.އާ ދެކޮޅަށް ކުރިއަށްގެންދާ ފިޔަވަޅުތައް ހުއްޓާނުލާނެ ކަމަށް ބުނެފައެވެ.