މާފުށީ ޖަލުގައި "ސެޓްފިކެޓް 1 އިން ސްޓާޓިން އެގްރިކަލްޗާ" ކޯހުގެ އަށް ވަނަ ބެޗް މޯލްޑިވްސް ކަރެކްޝަނަލް ސާވިސް (އެމްސީއެސް)އިން އިއްޔެ ފަށައިފިއެވެ. މި ކޯހުގައި ޖުމްލަ 20 ގައިދީން ބައިވެރިވެފައިވާއިރު، އެ ކޯސް ކުރިއަށްދާނީ ފަސްހަފުތާއަށް ކަމަށް އެމްސީއެސްއިން ބުންޏެވެ.
މި ކޯހުގެ މައިގަނޑު މަޤްޞަދަކީ ޖަލުގައި ތިބޭ ގައިދީންނަށް ދަނޑުވެރިކަމުގެ ހުނަރު ދަސްކޮށްދިނުމެވެ. އަދި ޖަލުން ނިކުތުމަށްފަހު، އެމީހުންނަކީ މުޖުތަމަޢަށް ބޭނުންތެރި އަދި ފައިދާހުރި މަސައްކަތްތައް ކުރާ ބަޔަކަށް ހެދުމަށް މަސައްކަތް ކުރުމަކީ ވެސް ކޯހުގެ ބޭނުމެކެވެ.
ދަސްކޮށްދޭ 10 މޮޑިއުލްގެ މައްޗަށް ފަރުމާކޮށްފައިވާ މި ކޯހުގައި ބައިވެރިވާ ގައިދީންނަށް ދަނޑުވެރިކަމަކީ ކޮބައިކަމާއި، ގަސް ހައްދާނެ ގޮތާއި، ގަހަށް ޖެހޭ ބަލިތަކާއި، ގަސް އިންދުމަށް ބިން ތައްޔާރުކުރާނެ ގޮތް ފަދަ މުހިންމު މައުލޫމާތުތައް ދަސްކޮށްދެވޭނެ ކަމަށް އެމްސީއެސްއިން ބުންޏެވެ.
މި ކޯހަކީ މޯލްޑިވްސް ކޮލިފިކޭޝަންސް އޮތޯރިޓީ (އެމް.ކިއު.އޭ)އިން އެކްރެޑިޓް ކޮށްގެން، އިންސްޓިޓިއުޓް ފޯ ކަރެކްޝަނަލް ސްޓަޑީޒް (އައިކޯސްޓް)އިން ކުރިއަށް ގެންދާ ކޯހެކެވެ. މި ކޯހުގައި ކިޔަވައިދެއްވަނީ އައިކޯސްޓްގެ މުދައްރިބެކެވެ.
