މިދިޔަ މަހު އިސްރާއީލުގެ 12 ދުވަހުގެ ވައިގެ ހަމަލާއިން ތެހެރާނުގެ ރާޑަރ ނެޓްވޯކަށް ގެއްލުންތައް ލިބުމުން، ޗައިނާއިން އުފައްދާފައިވާ ވައިގެ ދިފާއީ ނިޒާމުތައް ގަތުމަށް އީރާނުން މަޝްވަރާ ކުރަމުންދާ ކަމަށް ޚަބަރު ލިބެއެވެ.
އިސްލާމިކްރިޕަބްލިކް އެއާ ޑިފެންސް ފޯސްގެ އިންޖިނިއަރުންގެ ވަފުދެއް ހުސްވި މަހުގެ 25 ވަނަ ދުވަހު ޗިންގްޑާއޯއަށް ވަޑައިގެން، އެޗްކިއު‐9ބީ، އެޗްކިއު‐16 އަދި އެޗްކިއު‐17އޭއީ މިސައިލް ބެޓެރީ ގަންނަން ޗައިނާއާއެކު މަޝްވަރާތައް ބާއްވާފައިވާ ކަމަށް އީރާނުގެ ދައުލަތުގެ މީޑިއާތަކުން ކަށަވަރުކޮށްދެއެވެ. މިއީ މިހާރުވެސް އީރާނުން ބޭނުންކުރަމުންދާ ޗައިނާގެ ޓެކްނޮލޮޖީއެއްކަން ފާހަގަ ކުރެވެއެވެ.
އޯޕަން ސޯސް ފްލައިޓް ޓްރެކަރުން ވަނީ ޗައިނާގެ ހަބްތަކުން އީރާނަށް ބޮއިންގް747 ގެ އުޅަނދުތައް ފުރައިގެންދިޔަ ކަމަށް ރެކޯޑް ކުރެވިފައެވެ. މި ބޯޓުތައް ތުރުކުމެނިސްތާނުގެ މަތިން ވަނީ ރާޑަރުތަކަށް ގެއްލިފައެވެ. ރިޕޯޓުތައް ބުނާ ގޮތުގައި މި އަސްކަރީ އުޅަނދުތަކުގައި އީރާނަށްނވަނީ ހަތިޔާރު އެތެރެކޮށްފައެވެ.ފޮކްސްނިއުސް އާއި ސަލާމަތީ މަސްދަރު ތަކުން ރިޕޯޓްކުރާ ގޮތުގައި މި މަތިންދާބޯޓުގެ ފަހަތުން ޗައިނާގެ އަސްކަރީ މުދާ އުފުލާ ބޯޓުތައް ޕާކިސްތާނުން އީރާނަށް ނުސްވި ޖޫން މަހުގެ 30 ވަނަ ދުވަހު ހުރަސް ކޮށްފައި ވެއެވެ.
މަސްދަރުތަކުން ބުނާ ގޮތުގައި ފުރަތަމަ ޝިޕްމަންޓްގައި ހިމެނެނީ އެޗްކިއު-16 ގެ ދެ ބެޓެރީ އާއި ކުރު ރޭންޖް އެޗްކިއު-17އޭއީ ލޯންޗާތަކުގެ ބެޗެކެވެ.
ހުޅަނގުގެ މީޑިއާތަކުން ގެނެސްދިން ރިޕޯޓުތަކުގައި ވާގޮތުން ތެހެރާނުން ވަނީ ވަރަށް އަވަސް އަރުވާލައި ޗައިނާގެ ދިފާޢީ ސިސްޓަމްތައް ހޯދާފައެވެ. ސަބަބަކީ 13-24 ޖޫންގައި އިސްރާއީލުން އީރާނުގެ 100 އަށް ވުރެ ގިނަ އަމާޒު ތަކަށް ޙަމަލާދީ އީރާނުގެ ނިއުކްލިއާ ޕްރޮޖެކްޓު ދެތިން އަހަރަށް ފަހަތަށް ޖައްސާލުމާއި ގުޅިގެންނެވެ. އެމެރިކާ އާއި އިސްރާއީލުގެ ޙަމަލާތައް އަމާޒުވި ތަންތަނުގެ ތެރޭގައި ނަތަންޒް އިން ފެށިގެން ބަންޑާރަ އައްބާސް އާއި ހަމައަށް އަދި އިސްފާހާންގެ ދެކުނުގައި ހުރި އެސް-300 ހުރިހާ ރާޑަރެއް ނުކުޅެދުންތެރިކޮށްލި ކަމަށް ހުޅަނގުގެ ރިޕޯޓްތައް ބުނެ އެވެ. ހިސާބުތަކުން ދައްކާ ގޮތުގައި އީރާނުން ޝަހީދުވި މީހުންގެ އަދަދު 600 އަށް ވުރެ މައްޗަށް އަރާފައިވާއިރު، އޭގެ ތެރޭގައި އެއާ ޑިފެންސްގެ އިސް އޮފިސަރުން ވެސް ހިމެނެ އެވެ.
އީރާނުން ވަނީ ޓެލްއަވީވް، ހައިފާ އަދި އައިޑީއެފްގެ މަރުކަޒުތަކަށް މެކް‐16 ހައިޕަރސޮނިކް މިސައިލްތައް ބޭނުންކޮށްގެން ޙަމަލާދީ މިއިން ދުވަހަކު އިސްރާއީލަށް ނުކިބޭހާ ގެއްލުންދީ އެމެރިކާ ވެސް ބިރުގަންނުވާލާފައެވެ.
ބެއިޖިން އިން އީރާނަށް ހަތިޔާރާއި އައްޑަނަ ފޯރުކޮށްދޭތީ އެމެރިކާ އާއި އީޔޫގެ އޮފިޝަލުން ދަނީ އެކަމުގައި ބައިވެރިވާ ޗައިނާގެ ފަރާތްތަކާއި ދެކޮޅަށް ދަތިކުރުމުގެ ފިޔަވަޅުތައް އެޅުމަށް މަޝްވަރާ ކުރަމުންނެވެ.
މުޙައްލިލުން ފާހަގަކުރާ ގޮތުގައި އީރާނަށް "ޗައިނީސް ޝީލްޑެއް" ގެންދަނީ ރަޝިޔާއިން އެސް-400 ދޫކުރަން ފަސްޖެހުމާއި ގުޅިގެން، ބެއިޖިން އަކީ އެންމެ އަވަސް މަގު ކަމަށް ތެހެރާނުން ދެކޭތީއެވެ.
