ރާއްޖޭގެ ފުޓްބޯޅަ އޮތް އަޑިގަނޑުން ނަގާ، ފުޓްބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އަށް ގެއްލިފައިވާ އިތުބާރު އަލުން ހޯދައިދިނުމަށް، އެފްއޭއެމްގެ ރައީސް ކަމަށް މަހިނބަދޫ ދާއިރާގެ މެންބަރު އަހުމަދު ޠާރިޤް ކުރިމަތިލައްވައިފިއެވެ.
މިމަހުގެ 26 ގައި އޮންނަ އެފްއޭއެމްގެ އިންތިހާބުގައި ރައީސް ކަމަށް ވާދަކުރެއްވުމަށް މިއަދު ފޯމު ހުށަހެޅުއްވުމަށްފަހު މީޑިއާއާއި ބައްދަލުކުރައްވައި ޠާރިޤް ވިދާޅުވީ، އިންތިހާބަށް ނިކުންނެވީ އެފްއޭއެމް މާލީގޮތުންނާއި އެހެނިހެން ގޮތްގޮތުން ރަނގަޅުކުރަންޖެހޭ ކަންކަން ރަނގަޅު ކުރުމުގެ އުންމީދުގައި ކަމަށެވެ. އަދި އައު އެގްޒެކެޓިވް ކޮމިޓީއެއް އެކުލަވާލައި، ކަންކަން ރަނގަޅު ކުރުމުގެ ޕްލޭނެއް އެކުލަވާލައިގެން މަސައްކަތް ފައްޓަވާނެ ކަމަށް އޭނާ ވިދާޅުވިއެވެ.
"އަޅުގަނޑުމެންގެ އުންމީދަކީ އަހަރެއްހާ ދުވަހުގެތެރޭގައި ނޯމަލް ޕްރޮސެސްއަށް އެފްއޭއެމް ގެންދެވޭނެ ކަމަށް. އޭގެ ތެރޭގައި ފައިނޭޝަލީ ކަންތައްތައްވެސް އަދި މުބާރާތްތައްވެސް ޝެޑިއުލާއި އެއްގޮތަށް ކުރިޔަށް ގެންދެވޭނެ ގޮތަށް ތަރުތީބު ކުރުން އެއީ އަޅުގަނޑުމެންގެ އުންމީދަކީ." ޠާރިޤް ވިދާޅުވިއެވެ.
Advertisement
މިފަހަރު އޭނާއަށް ތާއީދު ނުލިބުނު ކުލަބުތަކުންވެސް ތާއީދު ލިބުނީ، އެ ކުލަބުތަކުންވެސް ފުޓްބޯޅަ ކުރިއަރުވަން ބޭނުންވާތީ ކަމަށް ޠާރިޤް ގަބޫލުކުރައްވައެވެ. މީގެކުރިން ފީފާއިން އިއުތިރާޒުކުރި އެފްއޭއެމްގެ އަސާސީ ގަވާއިދުގައި ހިމަނަންޖެހޭ މާއްދާތަކުގެ މައްސަލައަށް އަލިއަޅުވާލައްވަމުން ޠާރިޤް ވިދާޅުވީ، މީގެ ކުރިންވެސް ފުޓްބޯޅަ އެސޯސިއޭޝަނަށް ޒޯންތަކެއް ހަދައި އެސޯސިއޭޝަންތަކެއް ހެދުމުގެ މަސައްކަތްތައް ތަންފީޒު ނުކުރެވި އޮތުމުން، ފީފާއިން އެދުނީ އެތަންތަން ހެދުމަށްފަހު ހުއްދައަށް އެދުމަށެވެ.
ޠާރިޤް ވިދާޅުވީ، ކުރިޔަށް އޮތް ތަނުގައި ރާއްޖޭގެ ފުޓްބޯޅަ ކުރިޔަށްދާނީ ރީޖަނަލް އެސޯސިއޭޝަންތައް ހެދިގެން، ހަތަރު ރީޖަނުގެ ޓީމުތަކުން އައިސް އެފްއޭއެމްގެ ކަންކަމުގައި ބަސްބުނުމުގެ ފުރުސަތު ލިބިގެންދާނެ ގޮތަށް ކަމަށެވެ.
މިދިޔަ އަހަރު ދެފަހަރުވެސް އިންތިހާބު ގެންދަންޖެހޭ ގޮތަށް ޕްރޮސެސްތައް ނުގެންދިއުމުން ފީފާއިން އިންތިހާބު ހުއްޓުވިކަން ފާހަގަ ކުރައްވައި ޠާރިޤް ވިދާޅުވީ، މިފަހަރު އެއްވެސް އުނދަގުލެއް ނެތި އިންތިހާބުގެ ކަންކަން ކުރިޔަށް ދާނެ ކަމަށް ގަބޫލު ކުރައްވާ ކަމަށެވެ.
އެފްއޭއެމްގެ މެންބަރުންގެ ގޮތުގައިވާ ޖުމްލަ 23 ކުލަބުގެ ތާއީދު ސިޓީއާއިއެކު ކުރިމަތިލެއްވުމުން، އޭނާ އާއި ވާދަކުރަން ޝަރުތު ހަމަވާނެ އިތުރު ކެންޑިޑޭޓެއް ނުހުންނާނެކަމަށް ޠާރިޤް ފާހަގަ ކުރެއްވިއެވެ.
