އީރާނުގެ ސުޕްރީމް ލީޑަރު އާޔަތުالله ޢަލީ ޚާމަނާއީ މަރުވެއްޖެ ކަމަށް ޝައްކު އުފެދޭ ގޮތަށް ޚަބަރުތައް ފެތުރި އީރާނުގެ ތެރޭގައި ވެސް އެވާހަކަތައް އެކި ސިފަސިފާގައި އެބަ ދެކެވެއެވެ. ސޯޝަލްމީޑިއާގައިވެސް މިފަދަ ޝައްކު އުފެދޭ ފޮޓޯއާއި ވާހަކަތައް ދެކެވެއެވެ. ނަމަވެސް އެ ވާހަކަތަކަށް ތާއީދުކުރާ އެއްވެސް ހެއްކެއް މިހާތަނަށް ބައިނަލްއަޤްވާމީ އެއްވެސް މަސްދަރަކުން ހާމައެއް ނުކުރެއެވެ. މީގެތެރެއިން އެއް ފޮޓޯއަކީ އިސްރާއީލުން އޭނާ މަރާލައިފި ކަމަށް ބުނެ ސުވާލު އުފެއްދުމަށް ނެރެގެން އުޅޭ ފޮޓޯއެކެވެ. ނަމަވެސް ޙަޤީޤަތުގައި އެ ފޮޓޯ އަކީ ޚާމަނާއީގެ އޮޕަރޭޝަނަކަށް 2014 ވަނަ އަހަރުގެ އޮކްޓޯބަރުގައި ތެހެރާނުގެ ހޮސްޕިޓަލެއްގައި އެޑްމިޓް ކޮށްފައި އޮއްވާ ނަގާފައިވާ ފޮޓޯއެކެވެ.
ޚާމަނާއީ މަރައިލުމަށް އިސްރާއީލުން މިހާތަނަށް ކުރި މަސައްކަތް ކާމިޔާބުވެފައި ނުވާކަމަށް ވެއެވެ. އިސްރާއީލްގެ މޮސާޑުން ވަނީ ޚާމަނާއީއާއި ގުޅުން އޮތް މީހުންތަކެއްވެސް އެތައް މިލިއަން ޑޮލަރަކާއި އިނާޔަތެއް ދީ ގަނެލާފައި ކަމަށް ނުރަސްމީ މަސްދަރުތައް ބުނެއެވެ. ނަމަވެސް ޚާމަނާއީ އެއަށްވުރެ ހުޝިޔާރެވެ.
ޚާމަނާއީ މަރުވެއްޖެ ކަމަށް ދޭހަވާ ގޮތަށް ޝައްކުތައް އިތުރުވީ ދާދި ފަހުން އެމެރިކާއިންނާއި އިސްރާއީލުން ދިން އަސްކަރީ ހަމަލާތަކާއި މި އަހަރުގެ ޖޫން 13 އިން ފެށިގެން އިސްރާއީލާއި އީރާނުގެ ވަރުގަދަ ޙަމަލާބަދަލުވުންތަކަށްފަހު ޚާމަނާއީ “ގެއްލިފައި”ވާތީއެވެ. އެ ޙަމަލާތަކަށް ފަހު އެއްވެސް ވަރަކަށް ޢާންމުންނަކަށް ޚާމަނާއީ ފެނިފައެއް ނުވެއެވެ.. އޭގެފަހުން މިހާރު 22 ދުވަސް ވެއްޖެއެވެ.
Advertisement
ރޮއިޓާސް އިން ސަލާމަތީ މަސްދަރަކާއި ހަވާލާދީ ކަށަވަރުކޮށްދޭ ގޮތުގައި ޚާމަނާއީ މިވަގުތު ހުންނެވީ ސިއްރު ތަނެއްގައެވެ. އަދި ޖޫން 13 އިން ފެށިގެން ގައުމީ ސަލާމަތާ ބެހޭ ގޮތުން އޭނާއަށް މެދުނުކެނޑި މައުލޫމާތު ލިބެމުންދެއެވެ.
އަނެއްކޮޅުން އެމެރިކާއާއި އިސްރާއީލަށް އޭނާ ދިރިއުޅޭ ބިންގަރާސް އެނގިފައިވާ ކަމަށާއި، ނަމަވެސް އޭނާ ވަނީ ހަށިފާރަވެރިންނަށްވެސް ފިލާފައި ކަމަށް ޚަބަރުތައް ބުނެއެވެ. އެމެރިކާއިން ބުނަނީ ޚާމަނާއީ މަރައިލުމަށަ ބޭނުން ނުވާ ކަމަށެވެ. ނަމަވެސް އިސްރާއީލުން ބުނީ ޚާމަނާއީ މަރައިލުމަށް މަސައްކަތް ކުރި ކަމަށާއި، އޭނާ މަރައިނުލެވުނީ ޕާސަނަލްބޮޑީގާޑުންނަށް ފިލައިގެން މުޅީން އެކަހެރިވެގަތުމުންނެވެ.
ނުރަސްމީ ބައެއް ވެބްސައިޓްތަކުގައި ޚާމަނާއީ އަށް ވަރަށް ބޮޑު އަނިޔާއެއް ލިބި ކޯމާގައި އޮތްކަމަށް ވެސް ބުނެއެވެ. ނަމަވެސް އެވާހަކަތައް ފުށުއަރައެވެ. ސަބަބަކީ ޖޫން މަހުގެ 26 ވަނަ ދުވަހު ޚާމަނާއީގެ އިންޓަވިއުއެއްގެ ރެކޯޑިން އެޤައުމުގެ ޤައުމީ ޓީވީން ދުރަށް ދައްކާފައިވާތީއެވެ. އަދި އެ އިންޓަވިއުގައި ވަނީ މިފަހުން ބަދަލުކުރި ޙަމަލަތަކާއި، އެމެރިކާއާއި އިސްރާއީލަކަށް އީރާން ބަލި ނުކުރެވުނު ކަމާއި، އީރާނަށް ލިބުނު ކާމިޔާބީގެ ވާހަކަތަކެވެ.
ވީމާ، މަސްދަރުތަކުން އެނގޭ ގޮތުގައި ޚާމަނާއީ ދިރިހުރިކަން ގަބޫލުކުރެވެއެވެ. އަދި ހުސްވި މަހުގެ މެދުތެރެއިން ފެށިގެން އޭނާ ޢާންމުންނަށް ފިލައިގެން ތެހެރާން ކައިރީގައި ހުރި ބިންގަރާހެއްގައި އުޅެނީ ސަލާމަތީ ސަބަބުތަކަށްޓަކައި ކަމަށް ބެލެވެއެވެ.
