ރާއްޖެއިން ބޭރުގައި ދިރިއުޅޭ ދިވެހިންނަށް އެ ބޭންކުގެ ޑެބިޓް ކާޑުތަކުން މަހަކު 750 ޑޮލަރު އޭޓީއެމުން އަދިވެސް ނެގޭނެ ކަމަށް ގައުމީ ބޭންކް, ބީއެމްއެލް އިން އިއްޔެ ބުނެފި އެވެ.

އެއީ ކުރިން ވެސް އެކަން ހަމަޖައްސާފައި އޮތް ގޮތެވެ. އެ ނިންމުމަށް ބޭންކުން ބަދަލެއް ގެނެސްފައި ނުވެ އެވެ.

ބޭރުގެ އޭޓީއެމްތަކުން މަހަކު ނެގޭނީ މަހަކު 125 ޑޮލަރު ކަމަށް ބީއެމްއެލްއިން އިއްޔެ ހަމަޖެއްސީ ޑެބިޓް ކާޑުން މަހެއްގެ މައްޗަށް ކުރެވޭ ބޭރު ފައިސާގެ މުއާމަލާތުގެ އަދަދު 500 ޑޮލަރަށް ބޮޑުކުރުމާ އެކުގަ އެވެ. ނަމަވެސް, އޭގެ ތެރޭގައި ބޭރުގައި ދިރިއުޅޭ ދިވެހިންނާއި ބޭރުގައި ކިޔަވާ ދިވެހި ދަރިވަރުން ނުހިމެނެ އެވެ.

ބީއެމްއެލް އިން ބުނީ ރާއްޖެއިން ބޭރުގައި ދިރިއުޅޭ ނަމަ އަދި ކިޔަވާ ނަމަ ކުރިން ވެސް އޮންނަ ގޮތަށް، ބީއެމްއެލްގެ ވެބްސައިޓުގައި އެކަމަށް ހާއްސަކޮށްފައިވާ ޕޯޓަލް މެދުވެރިކޮށް ރަޖިސްޓާވުމުން ބޭރުގައި ދިރިއުޅޭ ދިވެހިންނަށް 750 ޑޮލަރު އަދި ބޭރުގައި ކިޔަވާ ދިވެހިންނަށް 1,200 ޑޮލަރުގެ ލިމިޓް ހަމަޖައްސައިދޭނެ ކަމަށެވެ.

ބީއެމްއެލް އިން ބުނީ ކާޑު ލިމިޓްތަކަށް ގެނައި ބަދަލުގެ އަސަރެއް ބޭރުގައި ދިރިއުޅޭ ދިވެހިންނާއި ބޭރުގައި ކިޔަވާ ދަރިވަރުންނަށް ނުކުރާނެ ކަމަށެވެ.

ބީއެމްއެލްއިން ވަނީ ރުފިޔާ ޑެބިޓް ކާޑުތަކުގެ ޑޮލަރު ލިމިޓު 500 ޑޮލަރަށް ބޮޑުކޮށް, އާންމުކޮށް ދިވެހިން އޮންލައިން ވިޔަފާރިއަށް ބޭނުންކުރާ ހަ ވެބްސައިޓު ކަމަށްވާ ޓީމޫ، ޝީއިން، އަލިބާބާ، އަލީ އެކްސްޕްރެސް، ލަޒާޑާ އަދި އީބޭ އިން 30 ޕަސެންޓާ ހަމައަށް ފީއެއް މި މަހުން ފެށިގެން ނަގަން ނިންމައިފަ އެވެ. ނަމަވެސް, ޑެބިޓް ކާޑު ފިޔަވާ އެހެެން އެއްވެސް ކާޑަކުން ކުރާ މުއާމަލާތަކަށް އެ ފީ ނުނަގާނެ އެވެ.