ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ސިންގަޕޫރުގެ އާބަން ރީޑިވެލޮޕްމަންޓް އޮތޯރިޓީ (ޔޫއާރުއޭ) އާއި ހައުސިން އެންޑް ޑިވެލޮޕްމަންޓް ބޯޑަށް މިއަދު ޒިޔާރަތްކުރައްވައިފި އެވެ.
ސިންގަޕޫރުގެ ރައީސްގެ ދައުވަތަކަށް ރައީސްގެ ދެކަނބަލުން މިހާރު އެ ގައުމަށް ކުރައްވާ ފުރަމާނަ ދަތުރުފުޅުގައި, އެމަނިކުފާނު ސިންގަޕޫރުގެ ޔޫއާރުއޭއަށް ވަޑައިގަތުމުން މަރުހަބާ ދެންނެވީ އެތަނުގެ ޑެޕިއުޓީ ސީއީއޯ އަދި ޗީފް ޕްލޭނަ މިސް އެޑެލް ޓަން ޝިއާއޯ ލިންގް އާއި ސިންގަޕޫރުގެ ހައުސިން އެންޑް ޑިވެލޮޕްމަންޓް ބޯޑުގެ ޑިރެކްޓަރު (ޕޮލިސީ އެންޑް ޕްރޮޕަޓީ) މިސް ސިއާ ޓްޒޭ މިންގް އެވެ.
ރައީސް އޮފީހުން ބުނީ އެތަނުން ރައީސް އާއި އެމަނިކުފާނުގެ އަރިހުގައި ވަޑައިގެންނެވި ވަފުދުގެ ބޭފުޅުންނަށް ވަނީ، ސިންގަޕޫރު ރައްޔިތުންގެ ލުއިފަސޭހައަށް އިސްކަންދޭ، ރައްކާތެރި އަދި ސްމާޓް ދިރިއުޅުމެއް އުޅެވޭނެ ސިޓީއެއް ބިނާކޮށް، ދެމެހެއްޓުމަށް ސިންގަޕޫރުން ގެންގުޅޭ ދުރުރާސްތާގެ ޕޮލީސެންޓްރިކް އާބަން ޕްލޭނިންއާ ބެހޭ ގޮތުން ޕްރެޒެންޓޭޝަނެއް ދީފައި ކަމަށެވެ.
އެ ޕްރެޒެންޓޭޝަނަށް ފަހު އޮތީ މޫސުމަށް އަންނަ ބަދަލުތަކަށް ހޭނިގެން، ރައްޔިތުންނަށް އަގުހެޔޮ ބޯހިޔާވަހިކަމެއް ހޯދައިދިނުމަށް އަމާޒުކުރުން ވެސް ހިމަނައިގެން، ސިންގަޕޫރު ސަރުކާރުން ހިންގާ މަލްޓިސެކްޓޯރަލް އާބަން ޕްލޭނިން މަޝްވަރާތަކުގައި އާންމުންގެ ބައިވެރިވުން ހިމެނުމަށް އެ ގައުމުން ކުރަމުން އަންނަ މަސައްކަތްތަކާ ބެހޭ ގޮތުން ބޭއްވި ސުވާލާއި ޖަވާބު ސެޝަނެއް ކަމަށް ރައީސް އޮފީހުން ބުންޏެވެ.
އެއަށް ފަހު ރައީސް ވަނީ ޔޫއާރްއޭގެ ސިންގަޕޫރު ސިޓީ ގެލެރީއަށް ޒިޔާރަތްކުރައްވައި، ސިންގަޕޫރުގެ އާބަން ޕްލޭނިންގެ އެކިއެކި މަރުހަލާތައް ބައްލަވާލައްވައިފަ އެވެ. އަދި އެ ސިޓީ ބެލެހެއްޓުމަށް މިދިޔަ އަހަރުތަކުގައި ކުރިމަތިވި އެކިއެކި ގޮންޖެހުންތަކާއި އެކަންކަމަށް ހައްލު ގެނެވުނު ގޮތް ބައްލަވާލައްވައިފަ އެވެ.
ރައީސް އޮފީހުން ބުނި ގޮތުގައި, ޔޫއާރްއޭއަކީ އެތަނުގެ ޑިސްޓްރިކްޓް ކޮންޒަވޭޝަން ޕްރޮގްރާމުގެ ސަބަބުން ދުނިޔޭގެ ފެންވަރުގައި ފާހަގަކޮށްލެވޭ ބައެކެވެ. އަދި އެއީ, ދެމެހެއްޓެނިވި ގޮތެއްގައި ދިރިއުޅުމަށް އެކަށޭނެ ތަންތަން ތަރައްގީކުރުމަށް ހާއްސަ ކޮށްފައިވާ ކުންފުންޏެކެވެ.
