ތ. ވިލުފުށީ ފަޅުގައި އޮތް ދެ ދޯންޏެއްގައި މިއަދު ހިނގި އަލިފާނުގެ ހާދިސާގައި ދެ ދޯނީގައި ރޯވެ ދެމީހަކު ވަރަށް ބޮޑަށް ފިހިގެން އިތުރު ފަރުވާއަށް މާލެ ގެނައުމުގެ މަސައްކަތް ފަށައިފި އެވެ.
ވިލިފުށީ ފަޅުގައި އޮތް ތެޔޮ އުފުލާ ދެ ދޯންޏެއްގައި ރޯވީ މިއަދު ހެނދުނު އެވެ. އެމްއެންޑީއެފް ސެންޓްރަލް އޭރިއާ ކޮމާންޑްގެ ފަޔާ ކޮމްޕޯނަންޓްގެ ސިފައިން ވަނީ އަލިފާން ނިއްވާލުމުގެ މަސައްކަތް ކޮށްފަ އެވެ.
އެ ރަށުން ވާހަކަދެއްކި މީހަކު ބުނީ އެ ހާދިސާގައި ދޯނީގެ ވެރިމީހާ އާއި އެތަނުން ދޯންޏެއްގައި މަސައްކަތްކުރާ ބިދޭސީ މީހަކު ފިހިގެން އެމީހުންނަށް ވިލިފުށީ ހެލްތު ސެންޓަރުގައި ފަރުވާދެމުން އަންނަ ކަމަށެވެ.
އިތުރު ފަރުވާއަށް އެ މީހުން މާލެ ގެނައުމުގެ މަސައްކަތް މިހާރު ކުރަމުން އަންނަ ކަމަށް އޭނާ ބުންޏެވެ.
އެ ހާދިސާ ހިނގަން މެދުވެރި ގޮތެއް އަދި ނޭނގެ އެވެ. އެއީ އެ ރަށަށް ތެޔޮ ސަޕްލައިކުރާ އަމިއްލަ މީހަކުގެ ދެ ދޯންޏެވެ. އެ ދެ ދޯނި އޮތީ އެ ރަށު ބަނދަރުގައި ކައިރީގައި ޖެހިޖެހިގެން ބަނދަރުކޮށްފަ އެވެ.
