ސިންގަޕޫރަކީ ދިވެހިން ތަރައްގީ ތަސައްވުރުކުރުމުގައި ނަމޫނާއަކަށް ބަލައި އަދި މުހިންމު ބައިވެރިއެއްގެ ގޮތުގައި ދެކޭ ގައުމެއް ކަމަށް ރައީސް ޑރ. މުޙައްމަދު މުޢިއްޒު މިއަދު ވިދާޅުވެއްޖެ އެވެ.

ރައީސް މިހާރު ސިންގަޕޫރަށް ކުރައްވަމުން ގެންދަވާ ފުރަމާނަ ދަތުރުފުޅުގައި ސިންގަޕޫރުގެ ރައީސް ތަރްމަން ޝަންމުގަރަނަމް ދެއްވި ޖާފަތުގައި ބައިވެރިވެވަޑައިގެން ދެއްކެވި ވާހަކަފުޅުގައި ވިދާޅުވީ ސިޔާސީ ގުޅުން ގާއިމްކުރުމުގެ މާ ކުރިން ވެސް ދިވެހި ދަތުރުވެރިންނަށް ސިންގަޕޫރަކީ މުހިންމު މަންޒިލެއް ކަމަށެވެ.

މިދިޔަ ދިގު މާޒީގައި އެ ގުޅުންތައް އިތުރަށް ބަދަހިވެ، ރާއްޖޭގެ ކުރިއެރުމާއި ތަރައްގީގައި ސިންގަޕޫރަކީ މުހިންމު ބައިވެރިއެއް ކަމަށް ރައީސް ވިދާޅުވި އެވެ.

ރައީސް ވަނީ 2004 ވަނަ އަހަރު ކުރިމަތިވީ ސުނާމީ ކާރިސާ އާއި 2014 ވަނަ އަހަރު ކުރިމަވި މާލެ ފެނުގެ ކާރިސާގައި ސިންގަޕޫރުން ދިން އެހީތެރިކަން ފާހަގަކުރައްވައިފަ އެވެ. އަދި ހުޅުމާލޭ ޣާޒީ ސްކޫލަކީ ވެސް އެ ގައުމުގެ އެހީތެރިކަމާއެކު ތަރައްގީކޮށްފައިވާ ތަނެއް ކަން ރައީސް ފާހަގަކުރެއްވި އެވެ.

ސިންގަޕޫރަކީ ދިވެހިން ތަރައްގީ އާއި ތަމައްދުން ތަސައްވުރުކުރުމުގައި މިސާލު ނަގާ ގައުމެއް ކަމަށާއި އެ ގައުމުން ލިބެން ހުރި ސިއްހީ އަދި ތައުލީމީ ހިދުމަތްތައް ދިވެހިން ބޭނުންކުރާ ކަމަށާއި އެކަމުގެ ފައިދާ ހޯދައި މިހާރު ގައުމަށް ހިދުމަތްކޮށްދެމުން އަންނަ ޖީލެއް އުފެދިފައިވާ ކަމަށް ވެސް ރައީސް ވިދާޅުވި އެވެ.

ސިންގަޕޫރާއި ރާއްޖެއާ ދެމެދުގައި ސިޔާސީ ގުޅުން ގާއިމުކުރިތާ 50 އަހަރު ފުރުން ފާހަގަކުރާ މި މުނާސަބު ވަގުތާއި ދިމާކޮށް ރައީސް އެ ގައުމަށް ކުރައްވާ މި ދަތުރުފުޅާއެކު ދެ ގައުމުގެ ގުޅުން އިތުރަށް ބަދަހިވާނެ ކަމަށް ރައީސް ވިދާޅުވި އެވެ.