ބޭންކް އޮފް މޯލްޑިވްސް (ބީއެމްއެލް) އިން ވިޔަފާރިތަކަށް ދޭ ޑޮލަރު ސަޕޯޓު އިތުރުކޮށްފިއެވެ.
ބީއެމްއެލް އިން މިއަދު ބުނީ ކުދި އަދި މެދުފަންތީގެ ވިޔަފާރިތަކުގެ ބޭނުމަށް ކުރާ ޓީޓީ މުޢާމަލާތްތަކަށް %30 އާ ހަމައަށް މިހާރު ޑޮލަރު ސަޕޯޓު ލިބޭނެ ކަމަށެވެ. އެއާއެކު ވިޔަފާރިތަކުން ކަޅު ބާޒާރުން ޑޮލަރު ހޯދަން ޖެހުމުގެ މައްސަލައަށް ލުއިތަކެއް ލިބޭނެ ކަމަށް ބޭންކުން ބުންޏެވެ.
މީގެ ކުރިންވެސް ބީއެމްއެލް އިން ބޮޑެތި ވިޔަފާރިތަކަށް ޓީޓީގެ މުޢާމަލާތްތަކަށް ވަކި ޢަދަދުތަކެއް ޑޮލަރުން ދޭން ކަނޑައަޅާފައިވެއެވެ. އަދި އަލަށް މި ގެނައި ބަދަލާއެކު ކުދި އަދި މެދު ފަންތީގެ ވިޔަފާރިތަކަށްވެސް ޓީޓީގެ މުޢާމަލާތްތަކަށް ބޭންކުން %30 ޑޮލަރު ސަޕޯޓު ލިބޭގޮތް މިވަނީ ހަމަޖެހިގެން ގޮސްފައެވެ.
މީގެ ކުރިން ކުދި އަދި މެދުފަންތީގެ ވިޔަފާރިތަކަށް ދޫކުރަނީ 5-10 ޕަސެންޓަށްވާ ޢަދަދުގެ ޑޮލަރެވެ.
ބީއެމްއެލް އިން ބުނީ ޓީޓީ ޚިދުމަތަށް އިންޓަނެޓް ބޭންކު މެދުވެރިކޮށް އެދެވޭނެ ކަމަށެވެ.
ބީއެމްއެލް އިން މިއަދު ވަނީ އެ ބޭންކުގެ ޑެބިޓް ކާޑުތަކުން ބޭރުގެ މުޢާމަލާތްތައް ކުރާ ލިމިޓުވެސް 250 ޑޮލަރުން 500 ޑޮލަރަށް މާދަމާއިން ފެށިގެން ބޮޑުކުރަން ނިންމާފައިވާ ކަމަށް ބުނެފައެވެ.
