މިއަދު މުޅި ރާއްޖެއަށް އުދައިގެ އަސަރުކުރާނެ ކަމަށް ލަފާކޮށް މެޓް އޮފީހުން ވައިޓް އެލާޓް ދެންމެ ނެރެފި އެވެ.
މެޓް އޮފީހުން މުޅި ރާއްޖެއަށް އެ އެލާޓް ނެރުނީ މިއަދު މެންދުރު ފަހު 1:30 އިން ފަށައިގެން ހަވީރު 5:00 އާ ހަމައަށެވެ.
މި ދުވަސްވަރު ދިޔަވަރު ބޮޑުވާ ގަޑިތަކުގައި ރާއްޖޭގެ ރަށްރަށަށް އުދައިގެ އަސަރު ވަރަށް ބޮޑަށް ކުރާނެ ކަމަށް މެޓް އޮފީހުން ކުރިން ވެސް ވަނީ ބުނެފަ އެވެ.
މެޓް އޮފީހުން ބުނީ މިއަދު އުތުރުގެ އަތޮޅުތަކަށް ދިޔަވަރު އެންމެ ބޮޑުވާނީ މެންދުރު ފަހު 3:01 ހާއިރު ކަމަށާއި 2.8 ފޫޓަށް ދިޔަވަރު ބޮޑުވުން އެކަށީގެންވާ ކަމަށެވެ.
މެދު ރާއްޖެ ތެރޭގެ އަތޮޅުތަކަށް މެންދުރުފަހު 3:43 ގައި 2.6 ފޫޓަށް ދިޔަވަރު ބޮޑުވާނެ ކަމަށް ލަފާކުރެވެ އެވެ. އަދި ދެކުނުގެ އަތޮޅުތަކަށް ހަވީރު 4:30 ގައި 2.9 ފޫޓަށް ދިޔަވަރު ބޮޑުވާނެ ކަމަށް ލަފާކުރެވެ އެވެ.
ދިޔަވަރު ބޮޑުވުމުގެ އިތުރުން އުތުރާއި މެދު ރާއްޖެ ތެރޭގެ ރަށްރަށަށް މިއަދު ވަރަށް ވިއްސާރަ އެވެ.
