އިންޑިއާގެ ދިއްލީގައި ހުންނަ ޖީ.ޓީ.ބީ ހޮސްޕިޓަލްގެ ސީނިއަރ ޑޮކްޓަރެއްގެ ބޮލުގައި ރާފުޅިއަކުން ޖަހައި ހަމަލާ ދީފިއެވެ.

އިންޑިއާގެ މަސްދަރުތަކުން ބުނާ ގޮތުގައި ސައިކަލުތަކުގައި ބަޔަކު އައިސް ހޮސްޕިޓަލްގެ ގޭޓް ކައިރިއަށް މަޑުކުރުމަށްފަހު ޑޮކްޓަރަށް ރާފުޅިއަކުން ހަމަލާދީފައިވާ ކަމަށާއި އެމީހުންގެ ތެރެއިން އެކަކީ ފުލުސް އޮފިސަރެއް ކަމަށް ބުނެފައިވާ ކަމަށެވެ. އަދި އެމީހުން އައީ ބަލިވެގެން ޑޮކްޓަރަށް ދެއްކުމަށް ކަމަށާއި، ނަމަވެސް ގޭޓުކައިރިން އެވަގުތު ދިމާވި ޑޮކްޓަރުގެ އޮފް ޑިއުޓީގައި އެ ޑޮކްޓަރުގެ ގާތު އޭނާ ބަލައިދިނުމަށް ޑިމާންޑް ކޮށް އެންމެ ފަހުން ހިނގި ދެބަސްވުމެއްގައި ޑޮކްޓަރުގެ ބޮލަށް ރާފުޅި ތަޅައިލައި ޒަޚަމް ކޮށްފައިވާ ކަމަށް ޚަބަރުތައް ބުނެއެވެ.

މިފަދަ ކަންކަމަކީ އިންޑިއާގައި ޢާންމު ކަންކަމެވެ. ފާއިތުވި ދިހަ އަހަރު ތެރޭގައި އިންޑިއާގައި ޑޮކްޓަރުންނާއި ދެކޮޅަށް އަނިޔާވެރިކަން ވަނީ އިންތިހާއަށް ގިނަވެފައި ކަމަށް ރިޕޯޓްތައް ބުނެއެވެ. އިންޑިއަން މެޑިކަލް އެސޯސިއޭޝަން (އައިއެމްއޭ) އާއި އެހެނިހެން ސާވޭތަކުން މިފަހުން ކުރި ދިރާސާއަކުން ދައްކާ ގޮތުގައި %75 އަށް ވުރެ ގިނަ ޑޮކްޓަރުންނަށް ވަޒީފާގެ ވަގުތުތަކުގައި އަނިޔާތަކާއި ކުރިމަތިވެފައި ވެއެވެ.

ކެރެލާގައި އެކަނި އެވްރެޖްކޮށް ކޮންމެ މަހަކު ޑޮކްޓަރުންނަށް ހަމަލާ ދީގެން 5 ކޭސް ރިޕޯޓް ކުރެވޭއިރު، 2020 އާއި 2023 އާ ދެމެދު މިފަދަ 200 އަށް ވުރެ ގިނަ ހާދިސާ ހިނގާފައި ވެއެވެ.

ޕަންޖާބުގައި މިދިޔަ އަހަރު ޑޮކްޓަރުންނާއި ނަރުހުންނަށް ހަމަލާދީގެން 50 އަށްވުރެ ގިނަ މައްސަލަ ހުށަހަޅާފައި ވެއެވެ.