މެލޭޝިއާގައި ކިޔަވާ ބޭރުގެ ދަރިވަރުންގެ އަތުން ޓެކްސްއެއް ނަގަން އެ ގައުމުގެ ސަރުކާރުން ނިންމާފައި ވިޔަސް، ދިވެހި ދަރިވަރުންނަށް އެ ބުރަ އުފުލަން ނުޖެހޭ ގޮތަށް ސަރުކާރުން ކަންކަން ހަމަޖައްސަވާނެ ކަމަށް ހަޔަ އެޑިއުކޭޝަން މިނިސްޓަރު ޑރ. އަލީ ހައިދަރު އަހުމަދު މިއަދު ވިދާޅުވެއްޖެ އެވެ.
ދައުލަތުގެ މީޑިއާ، ޕީއެސްއެމަށް ހައިދަރު ވިދާޅުވީ މެލޭޝިއާ ސަރުކާރުން އެ ނިންމުން އިއުލާނުކޮށް ތަންފީޒުކުރުމާއި ދެމެދު ދީފައި ވަނީ ހަފުތާއެއްހާ ދުވަހުގެ މުއްދަތެއް ކަމަށެވެ. ނަމަވެސް އެކަން މެލޭޝިއާގެ ސަރުކާރުން ރަސްމީކޮށް ދިވެހި ސަރުކާރަށް އަންގާފައި ނުވާ ކަމަށް ހައިދަރު ވިދާޅުވި އެވެ.
އެހެންވެ، ކުރިއާލާ އެކަމުގައި ފިޔަވަޅެއް އެޅުމަށް އެކަމާއި ގުޅޭ ގޮތުން މަޝްވަރާކޮށް ގޮތެއް ނިންމުމަށް އަދި އެކަށީގެންވާ ވަގުތު ލިބިފައި ނުވާ ކަމަށް ހައިދަރު ވިދާޅުވި އެވެ.
ނަމަވެސް، އެކަން ސަރުކާރުގެ ސަމާލުކަމަށް އައިސް، މިހާރު ވަރަށް ގާތުން ބަލަމުން އަންނަ ކަމަށް އޭނާ ވިދާޅުވި އެވެ.
ހައިދަރު ވިދާޅުވީ މެލޭޝިއާއަކީ ގިނަ އަދަދެއްގެ ދިވެހި ދަރިވަރުން ތައުލީމު ހާސިލުކުރާ ގައުމަކަށް ވުމުން އެކަމުގައި އެޅޭނެ ފިޔަވަޅުތަކާ މެދުގައި މަޝްވަރާކުރަމުން އަންނަ ކަމަށާއި ދަރިވަރުންނަށް ބުރައަކަށް ނުވާނެހެން ކަންކަން ހަމަޖަސަވާނެ ކަމަށެވެ.
ސަރުކާރުގެ ސްކޮލަޝިޕާއި ލޯނުގައި ކިޔަވާ ދަރިވަރުން އަދި އަމިއްލަ ގޮތުން ކިޔަވަން ގޮސް ތިބި ދަރިވަރުންނަށް ވެސް ލުއިފަސޭހަ ގޮތްތަކެއް ހަމަޖައްސައިދިނުމަށް ސަރުކާރުން މަސައްކަތްކުރާނެ ކަމަށް އޭނާ ވިދާޅުވި އެވެ.
މެލޭޝިއާގެ ސޭލްސް އެންޑް ޓެކްސްގެ ގާނޫނަށް މިދިޔަ ހަފުތާގައި ގެނައި ބަދަލުގައި ވަނީ މެލޭޝިއާގައި ކިޔަވާ ބޭރުގެ ދަރިވަރުންގެ އަތުން ހަ ޕަސެންޓުގެ ޓެކުހެއް ނަގަން ނިންމައިފަ އެވެ. އަދި އަންނަ މަހު އެކަކުން ފެށިގެން އެ އިސްލާހަށް އަމަލުކުރަން ވަނީ ނިންމައިފަ އެވެ.
