މެލޭޝިއާގައި ދިރިއުޅޭ ދިވެހިންގެ މެދުގައި ބޮޑު މަގުބޫލުކަމެއް ހޯދަމުން އަންނަ "ސުބާންގް ކަޕް" ފުޓްސަލް މުބާރާތުގައި ވާދަކުރަމުންދާ ގއ. ދެއްވަދޫގެ "ހަވިއްތަ ސްޕޯޓްސް" އަށް ނިސްބަތްވާ ތިން ޓީމުވެސް މުބާރާތުގެ ކުއާޓަރ ފައިނަލުން ޖާގަ ހޯދައިފިއެވެ.
މިއަދު ހެނދުނުން ފެށިގެން އެއް ދުވަހުގެ މުއްދަތަށް މެލޭޝިއާގެ ކުއަލަަލަމްޕޫރުގައި ކުރިއަށްދާ މި މުބާރާތުގެ ގްރޫޕް ސްޓޭޖުގެ މެޗުތައް މިހާރު ނިމިފައިވާއިރު، އެންމެ ފާހަގަކޮށްލެވޭ ވަރުގަދަ ކުޅުމެއް ދައްކާފައިވަނީ އަލަށް އުފެދުނު ހަވިއްތަ ޖޫނިއަރސް އެވެ.
މުބާރާތުގެ ގްރޫޕް ބީ ގައި ވާދަކުރި ހަވިއްތަ ސްޕޯޓްސްގެ މައި ޓީމު ވަނީ ކުޅުނު ހުރިހާ މެޗަކުން މޮޅުވެ، ގްރޫޕްގެ އެއްވަނަ ހޯދާފައެވެ. އެ ޓީމު ވަނީ ކޮބާ އެފްސީ އަތުން 3-1 އިން، އީސިއަންސް އަތުން 2-1 އިން އަދި ކްލެސިކް ޔޫތު އަތުން 5-1 އިން މޮޅުވެފައެވެ.
Advertisement
ހަމައެއާއެކު، ހަވިއްތަ ޖޫނިއަރސް ވަނީ ގްރޫޕް ސީ ގެ ހުރިހާ މެޗަކުން ތަފާތު ބޮޑު ނަތީޖާތަކަކާއެކު މޮޅުވެފައެވެ. އެގޮތުން، ކްލަބު ރޮދި ބޮޓްސް އަތުން 7-1 އިން މޮޅުވި އިރު، އެފްސީ ފްރެންޑްސްގެ މައްޗަށް ވަނީ 12-0 ގެ ބޮޑު ނަތީޖާއަކުން ކުރިހޯދާފައެވެ. އަދި ގްރޫޕްގެ ފަހު މެޗުގައި ކްލަބް އީސީ ބަލިކުރީ 7-2 ގެ ނަތީޖާއަކުންނެވެ.
ހަވިއްތަ ސްޕޯޓްސްގެ ދެވަނަ ޓީމު، އެޗްއެސް ޔުނައިޓެޑް ވާދަކުރީ ގްރޫޕް ޑީ ގައެވެ. މި ގްރޫޕްގައި ކުޅުނު އެއް މެޗުން ޒެޕޯ އެސްސީ އަތުން 3-2 އިން ބަލިވި ނަމަވެސް، ކްލެސިކް ޖޫނިއަރ އަދި ޓީމް ޔޫއެސްޖީ އަތުން 4-1 އިން މޮޅުވެ، ގްރޫޕްގެ ދެވަނަ ޓީމުގެ ގޮތުގައި އެޗްއެސް ޔުނައިޓެޑް ވަނީ ކުއާޓަރ ފައިނަލުން ޖާގަ ކަށަވަރުކޮށްފައެވެ.
ގްރޫޕް ސްޓޭޖުގެ ކާމިޔާބީއާ ގުޅޭގޮތުން "ޚުލާސާ" ނޫހަށް މައުލޫމާތު ދެއްވަމުން ހަވިއްތަ ސްޕޯޓްސްގެ ޖެނެރަލް މެނޭޖަރ ސައީދު އަހްމަދު ވިދާޅުވީ، މިއީ މިއަދު މުޅި ޓީމުގެ ކުޅުންތެރިން ކުރި ބުރަ މަސައްކަތުގެ ފޮނި ނަތީޖާ ކަމަށެވެ. މިއީ މި މުބާރާތުގައި އެ ކްލަބުން ވާދަކުރާ ފުރަތަމަ ފަހަރު ކަމަށް ވިޔަސް، މައިގަނޑު އަމާޒަކީ މުބާރާތުގެ ތަށި ކާމިޔާބުކުރުން ކަމަށް ސައީދު ފާހަގަކުރެއްވިއެވެ.
"މުބާރާތަށް ތައްޔާރުވުމަށްޓަކައި އަތުކުރި އޮޅާލި ފުރަތަމަ ދުވަހުން ފެށިގެން މިއަދާ ހަމައަށް ވެސް ކުޅުންތެރިންގެ އަޒުމަކަށް އެއްވެސް ބަދަލެއް ނާދޭ،" ކްލަބުގެ ޒުވާން ކުޅުންތެރިން ދެއްކި ހިތްވަރަށް މެނޭޖްމަންޓުގެ ފަރާތުން ޝުކުރު އަދާކުރައްވަމުން ސައީދު ވިދާޅުވިއެވެ.
މުބާރާތުގެ ފޯރިގަދަ ކުއާޓަރ ފައިނަލްގެ މެޗުތައް ފެށުމަށް ހަމަޖެހިފައިވަނީ މިއަދު މެންދުރު ފަހުގެ ވަގުތެއްގައެވެ. ހަވިއްތަ ސްޕޯޓްސް އިން ވަނީ ރާއްޖެއިން ހުނަރުވެރި އަދި ތަޖުރިބާކާރު ގިނަ ކުޅުންތެރިންތަކަކާއެކު މި މުބާރާތަށް ނުކުމެ، ތަށި ރާއްޖެއަށް ގެނައުމަށް ފުރިހަމައަށް ތައްޔާރުވެފައެވެ.
