12 ދުވަސް ވަންދެން އީރާނާއި ދެކޮޅަށް ހަނގުރާމަކޮށް އެ ޤައުމުގެ ސުޕްރީމް ލީޑަރު އާޔަތުﷲ ޢަލީ ޚާމަނާއީ އަވަހާރަކުރަން އިސްރާއީލުން މަސައްކަތްކޮށްފައިވާ ކަމަށާއި، ނަމަވެސް، އެކަން ނާކާމިޔާބުވީ ޚާމަނާއީ ވަރަށް ފުން ބިންގަރާހެއްގެ ތެރެއަށް ވަދެ ފިލައިގެން ހުރުމުން ކަމަށް އިސްރާއީލުގެ ދިފާޢި ވަޒީރު ކާޓްޒް ވިދާޅުވެއްޖެއެވެ.
އިއްޔެ މީޑިއާ ބައްދަލުވުންތަކުގައި ވާހަކަ ދައްކަވަމުން ކާޓްޒް ވަނީ އީރާނާއި ދެމެދު ކުރި ހަނގުރާމައިގައި އެންމެ މުހިންމު ކަމެއްގެ ގޮތުގައި ރާވާފައި އޮތީ ޚާމަނާއީ އަވަހާރަކޮށްލުމަށެވެ.
ރިޕޯޓުތައް ބުނާ ގޮތުން ޚާމަނާއީ ވަނީ އަސްކަރީ ކޮމާންޑަރުންނާއި ވެސް ގުޅުން ކަނޑާލާފައެވެ. އަދި ހުރިހާ ސިއްރު ފާރަވެރިންނަށް ވެސް ޚާމަނާއީ ހުރީ ފިލައިގެންނެވެ.
ކާޓްޒް ވިދާޅުވީ ޚާމަނާއީ އަވަހާރަކޮށްލުމަކީ އެންމެ މުހިންމު އެއް މިޝަން ކަމަށާއި އެކަމުގައި ވަކި ޤައުމެއްގެ ހުއްދައެއް އިސްރާއީލުން ހޯދާކަށް ނުޖެހެއެވެ. އަދި އެމެރިކާއަކަށް ވެސް އިސްރާއީލް ގާތު ޚަމަނާއީ އަވަހާރަކޮށްނުލުމަށް ނުބުނެވޭނެ ކަމަށް އޭނާ ވިދާޅުވިއެވެ.
"އެމެރިކާގެ ހުއްދައެއް ބޭނުމެއް ނުވޭ. އަޅުގަނޑުމެންގެ ސަލާމަތަށް ނުރައްކަލެއް ކުރިމަތިވުމުން އަޅުގަނޑުމެން މަސައްކަތް ކުރަނީ މިނިވަންކަމާއެކުގަ،" ކާޓްޒް ވިދާޅުވިއެވެ.
އެމެރިކާގެ ބައިވެރިވުމާއެކު ހަމަލާ ބަދަލުކުރުން ހުއްޓާލުމަށް މަސައްކަތްކުރުމަށްފަހު، ޚާމަނާއީ އަވަހާރަކުރުމުގެ މަސައްކަތް ވަނީ ހުއްޓާލާފައެވެ. ނަމަވެސް، އިރާނުން ދުރުރާސްތާ މިސައިލް ނުވަތަ ނިއުކްލިއަރ ހަތިޔާރު ތަރައްޤީކުރަން އަލުން ފަށައިފިނަމަ، ޚާމަނާއީ އާއި ދެކޮޅަށް ކުރަންޖެހޭ ކަންތައްތައް "މޭޒުމަތީގައި އެބަހުރި" ކަމަށް ބުނެ ކާޓްޒް ވަނީ އިންޒާރު ދެއްވާފައެވެ.
