މިހާތަނަށް ހަމައެކަނި ދަރުމަވަންތަ ހޮސްޕިޓަލްގައި ފަހިކޮށްދެމުން އައި މެޑިކަލް އިންޓަރންޝިޕް ފުރިހަމަކުރުމުގެ ފުރުޞަތު، ފުރަތަމަ ފަހަރަށް ހުޅުމާލޭ ހޮސްޕިޓަލްގައި ހުޅުވާލައިފި އެވެ. ސަރުކާރުން މިހާރު ވަނީ މާލޭގެ އިތުރު ހޮސްޕިޓަލަކާއި އަތޮޅުތަކުގައިވެސް އެ ފުރުޞަތު ދެވޭނެ ހޮސްޕިޓަލްތައް ކަނޑައަޅާފައެވެ.

ޑޮކްޓަރުކަން ކިޔަވައިގެން ނިކުންނަ ފަރާތްތައް ދާއިމީ ޚިދުމަތަށް ނިކުތުމުގެ ކުރިން 1 އަހަރު ދުވަހުގެ މެޑިކަލް އިންޓަރންޝިޕް ޕްރޮގްރާމެއް ފުރިހަމަކުރަން ޖެހެއެވެ. ނަމަވެސް މިހާތަނަށް އިންޓަރންޝިޕް ހެދުމުގެ ހުއްދަ އޮންނަނީ ހަމައެކަނި ދަރުމަވަންތަ ހޮސްޕިޓަލުންނެވެ. މިކަމުގެ ސަބަބުން، ހަމައެކަނި އެއް ހޮސްޕިޓަލެއްގައި މި ޕްރޮގްރާމް ހިންގުމާއި، ލިބޭ ޖާގަ މަދުކަމުގެ ސަބަބުން އިންޓަރންޝިޕް ފުރިހަމަކުރުމުގައި ދިގު މުއްދަތެއް ހޭދަކުރަން ޖެހުމުގެ ޝަކުވާ ގިނަ ދަރިވަރުންގެ ފަރާތުން އާދެއެވެ.

މިކަމުގައި ހުރި ޝަކުވާތަކަށް ޙައްލެއް ހޯދުމުގެ ގޮތުން ސަރުކާރުން ވަނީ ހުޅުމާލޭ ހޮސްޕިޓަލް އަދި އައްޑޫ އިކުއިޓޯރިއަލް ހޮސްޕިޓަލްގައި މެޑިކަލް އިންޓަރންޝިޕް ފުރިހަމަކުރެވޭނެ އިންތިޒާމު ހަމަޖައްސާފައެވެ. އައްޑޫ އިކުއިޓޯރިއަލް ހޮސްޕިޓަލްގެ މެޑިކަލް އިންޓަރންޝިޕް ޕްރޮގްރާމްވެސް މިހާރު ވަނީ ކުރިއަށް ގޮސްފައެވެ.

ހުޅުމާލޭ ހޮސްޕިޓަލްގެ މެޑިކަލް އިންޓަރންޝިޕް ޕްރޮގްރާމްގައި ބައިވެރިވުމަށް މިހާރު ވަނީ ފުރުޞަތު ހުޅުވާލާފައެވެ. އެ ހޮސްޕިޓަލުން ހުޅުވާލާފައިވަނީ 15 ފުރުޞަތެވެ. ހުޅުމާލެ ހޮސްޕިޓަލްގެ އިންޓަރން ޕްރޮގްރާމްގައި ބައިވެރިވާން ބޭނުންވާ ގްރެޖުއޭޓުން، ޖޫން 29އިން ފެށިގެން، ޖުލައި 8ގެ 12:00އާ ހަމައަށް އެކަމަށް އެދި ފޯމު ހުށައެޅުމަށް ވަނީ ހުޅުވާލާފައެވެ. ބައިވެރިންގެ ޝަރުތުތަކާއި ފޯމާއެކު ހުށައަޅަންޖެހޭ ލިޔެކިޔުންތަކުގެ ތަފްސީލްތައް ގެޒެޓުގައި ވަނީ ހިމަނާފައެވެ.

https://www.gazette.gov.mv/iulaan/335723

އިންޓަރންޝިޕް ޕްރޮގްރާމަށް ޝަރުޠު ފުރިހަމަވާ 15 އަށްވުރެ ގިނަ ފަރާތުން ކުރިމަތިލައިފިނަމަ، ޕްރޮގްރާމަށް ބައިވެރިން ހޮވުމުގައި އިސްކަން ދެވޭނީ އެމް.ބީ.ބީ.އެސް ފުރިހަމަ ކޮށްފައިވާ ތާރީހަށް ބަލައި، ކޯސް ފުރިހަމަ ކުރިފަހުން ގިނަ ދުވަސް ވެފައިވާ ފަރާތްތަކަށާއި މެއިލްފޮނުވާ ތަރުތީބަށް ކަމަށް ހުޅުމާލޭ ހޮސްޕިޓަލުން ވަނީ ފާޙަގަކުރައްވާފައެވެ.