ހުޅުމާލެ ހޮސްޕިޓަލުގައި ޑަޔަލިސިސް ސެންޓަރެއް ގާއިމް ކޮށްފި އެވެ.

މި ސެންޓަރު ހުޅުވުމުގެ ރަސްމިއްޔާތު މިއަދު ކުރިއަށް ދިޔައީ އޮރެންޖް ހިޔާ އިމާރާތުގެ ފުރަތަމަ ފަންގިފިލާގަ އެވެ. 30 ބަލި މީހުންނަށް އެއްފަހަރާ ފަރުވާ ދިނުމުގެ ގާބިލުކަން ލިބިފައިވާ މި ސެންޓަރު ހުޅުވައިދެއްވީ ރާއްޖޭގެ ރައީސުލްޖުމަހޫރިއްޔާ ޑރ. މުހައްމަދު މުއިއްޒެވެ.

މި ރަސްމިއްޔާތުގައި ވާހަކަ ދައްކަވަމުން ހުޅުމާލޭ ހޮަސްޕިޓަލުގެ ސީއީއޯ ވިދާޅުވީ ހުޅުމާލޭގައި އެންމެ ފުރަތަމަ ޑަޔަލިސިސްގެ ހިދުމަތް ފެށުނީ އެންމެ ހަތަރު އެނދާއި އެކު ކަމަށެވެ. ނަމަވެސް މިހާރު މި ގާއިމުކުރެވުނު ތަރައްގީ އާއި އެކު އަލަށް ހުޅުވުނު ސެންޓަރުގައި 30 އެނދުގެ ޖާގަ ހުންނާނެ ކަމަށް ސީއީއޯ ވިދާޅުވި އެވެ.

މީގެ ކުރިން ހުޅުމާލެ ހޮަސްޕިޓަލުގައި މި ހިދުމަތް ދެމުން ދިޔައީ އެއް ދަންފަޅީގަ އެވެ. ނަމަވެސް، އާ ސެންޓަރާ އެކު މިހާރު މިވަނީ ދެ ދަނފަޅީގައި ވެސް ހިދުމަތް ދެވޭނެ ގޮތަށް ބަދަލު ގެނެސްފަ އެވެ.

މީގެ އިތުރުން ކްރިޓިކަލް ހާލަތެއް ދިމާވެއްޖެ ނަމަ ހިދުމަތް ދެވޭނެ ހާއްސަ ދެ އެނދު ވެސް މި ސެންޓަރަށް ތައާރަފްކުރެވިފައިވެ އެވެ.

މި ހިދުމަތަކީ ކިޑްނީ ބަލިތަށް ހުންނަ މީހުން ކޮންމެ ހަފްތާއަކު އެއް ގަޑިއިރު ހޯދަން ޖެހޭ ހިދުމަތަކަށް ވުމާއި އެކު، މިހާރު އެއްވެސް ބޭފުޅަކު ކިއު ޖެހުމުގެ އުނދަގޫތަކާއި ކުރިމަތިލާން ނުޖެހޭނެ ކަމަށް ހުޅުމާލެ ހޮސްޕިޓަލުގެ ސީއީއޯ ވަނީ ވިދާޅުވެފަ އެވެ.

މި ސެންޓަރުގައި ފަރުވާ ދިނުމަށް ތިއްބަވާނީ ހާއްސަ ތަމްރީނު ލިބިފައިވާ ޤާބިލް ޑޮކްޓަރުންނާއި ނަރުހުންނެވެ.