Fainu gai rey hi’ngi accident gai aniyaavi 2 kudhin male' genesfi

ޚުލާސާ

އެކްސިޑެންޓުގައި އަނިޔާވި ދެ ކުދިން ހާލު އަދިވެސް ސީރިއަސް. ދެން އަނިޔާވި ދެ މީހުންގެ ތެރެއިން އެކަކުގެ ފަޔަށް ވަނީ ސީރިއަސް އަނިޔާތަކެއް ލިބިފައި.

ރ. ފައިނުގައި ރޭ ހިނގި ނުރައްކާތެރި އެކްސިޑެންޓުގައި އަނިޔާވި ދެ ކުދިން އިތުރު ފަރުވާއަށް މިއަދު މާލެ ގެނެސްފި އެވެ.

ރ. އުނގޫފާރު ރީޖަނަލް ހޮސްޕިޓަލުން ބުނީ އެ އެކްސިޑެންޓުގައި އަނިޔާވި ދެ ކުދިން މިހާރު މާލެ ގެނެސްފައިވާ ކަމަށެވެ. އަދި އެ އެކްސިޑެންޓުގައި އަނިޔާވި ދެމީހުންގެ ތެރެއިން އެކަކު އިތުރު ފަރުވާއަށް މިއަދު މާލެ ފޮނުވާލާނެ ކަމަށް އެ ހޮސްޕިޓަލުން ބުންޏެވެ.

އުމުރުން 18 އަހަރުން ދަށުގެ ކުއްޖަކާއި ފައިނު ސްކޫލްގެ ދަރިވަރަކު ދުއްވި އެ ސައިކަލު ޖެހުނީ މަގުމަތީގައި ކަސްރަތަށް ހިނގަން ނުކުމެ އުޅުނު ދެ މީހެއްގެ ގައިގަ އެވެ. ކަސްރަތަށް ނުކުމެ އުޅުނީ އެ ރަށު ސްކޫލްގެ ޕްރިންސިޕަލާއި ޓީޗަރެކެވެ.

އެކްސިޑެންޓުގައި އަނިޔާވި ދެ ކުދިން ހާލު އަދިވެސް ސީރިއަސް އެވެ. ޕްރިންސިޕަލުގެ ހާލު މިހާރު ސްޓޭބަލް އެވެ. އެކަމަކު، ޓީޗަރުގެ ފަޔަށް ވަނީ ސީރިއަސް އަނިޔާތަކެއް ލިބިފަ އެވެ.