އިޒްރޭލާއި އިރާނާ ދެމެދު 12 ދުވަސް ވަންދެން ހިނގި ހަމަލާތައް މުޅިން ހުއްޓާލުމަށް އެއްބަސްވެއްޖެ ކަމަށް އެމެރިކާގެ ރައީސް ޑޮނަލްޑް ޓްރަމްޕް އިޢުލާން ކުރައްވައިފިއެވެ. ސޯޝަލް މީޑިއާގައި ޓްރަމްޕް ވިދާޅުވީ، މި ހަމަލާތައް ހުއްޓާލުމަށް ހުރިހާ މަސައްކަތެއް ކުރެއްވީ އޭނާ ކަމަށާއި، މި ކަމުގެ ސަބަބުން ސުލްހައިގެ ވާހަކަތަކަށް އުންމީދު އާވެގެން ގޮސްފި ކަމަށެވެ.

ޓްރަމްޕް ވިދާޅުވި ގޮތުގައި، ހަމަލާތައް ފުރަތަމަ ހުއްޓާލީ އިރާނުން ކަމަށާއި، އޭގެ ގަޑިއިރުތަކެއް ފަހުން އިޒްރޭލުންވެސް ހަމަލާތައް ހުއްޓާލިއެވެ. ހަމަލާ ހުއްޓާލުން ސިފަކުރެއްވީ 'ބޮޑު ކާމިޔާބީއެއް'ގެ ގޮތުގައެވެ. އަދި އޭނާގެ މަންދޫބު ސްޓީވް ވިޓްކޮފް މިކަމާއި ގުޅޭ އިތުރު ތަފްސީލެއް އާންމުކުރާނެ ކަމަށްވެސް ޓްރަމްޕް ހާމަކުރެއްވިއެވެ.

ޓްރަމްޕް ވަނީ، އިންޑިއާއާއި ޕާކިސްތާނާ ދެމެދު ގުޅުން ރަނގަޅުކުރެއްވުމުގައި އޭނާއަށް ލިބުނު ކާމިޔާބީއާ އަޅުވައި، މި ފަހަރުވެސް ސުލްހައިގެ އެއްބަސްވުމެއް ހޯދިދާނެ ކަމަށް އިޝާރާތް ކުރައްވާފައެވެ.

މި 12 ދުވަހު ބޮޑެތި ހަމަލާތަކެއް ދެ ފަރާތުން ބަދަލުކޮށްފައިވެއެވެ. މިގޮތުން އިޒްރޭލުން ވަނީ އިރާނުގެ ނިއުކްލިއަރ ފެސިލިޓީތަކަށް ވައިގެ ހަމަލާތައް ދީފައެވެ. އަދި އިރާނުން ވަނީ އިޒްރޭލުގެ އިތުރުން މެދުއިރުމަތީގައި ހުންނަ އެމެރިކާގެ އަސްކަރީ މަރުކަޒުތަކަށް މިސައިލް ހަމަލާތައް ދީފައެވެ. މި ހަމަލާތަކުގައި އިޒްރޭލުން މަދުވެގެން 24 މީހުން މަރުވެފައިވާއިރު އެޤައުމުން ދަނީ ލިބުނު ގެއްލުންތައް ފޮރުވަމުންނެވެ.

އިޒްރޭލާއި އިރާނުގެ ސަރުކާރުން މި ހަމަލާ ހުއްޓާލިކަން ރަސްމީކޮށް ކަށަވަރުކޮށްފައި ނުވިޔަސް، ބައިނަލްއަޤްވާމީ މާކެޓުތަކަށް ވަނީ ހެޔޮ ބަދަލުތަކެއް އައިސްފައެވެ. އަދި މިއަދުގެ ވަގުތެއްގައި މަޝްވަރާތައް ފަށާނެ ކަމަށް ރަސްމީ މަސްދަރުތަކުން ބުނެއެވެ.

މަސްރަހު ދިރާސާކުރާ ފަރާތްތަކުން މި ހަމަލާ ބަދަލުކުރުން ހުއްޓާލުން ބަލަނީ އެމެރިކާ އާއި އިޒްރޭލަށް އީރާނުގެ ކުރިމަތީގައި މޮޅު ނުވެވުނު ކަމުގެ ހެއްކެއްގެ ގޮތުގައެވެ.