ކުރީ ސަރުކާރުގެ ކޮރަޕްޝަނާއި އިހުމާލުގެ މައްސަލަތައް ދިމާވި 4،000 ފްލެޓްގެ ބޯހިޔާވަހިކަމުގެ ބޮޑު މަޝްރޫޢު މިސަރުކާރުން ކުރިޔަށްގެންދާ ގޮތާއި، އަދި އޭގެ ފެންވަރާއި މަސައްކަތް ކުރިއަށްދާ ދުވެއްޔާއި މެދު ވަރަށް ބޮޑަށް ހިތްހަމަޖެހޭ ކަމަށް ގެދޮރުވެރިކަމާއި ބިނާރާބެހޭ ވަޒީރު މުއްޠަލިބު ވިދާޅުވެއްޖެއެވެ.
މިނިސްޓަރު މުތާލިބު ވިދާޅުވީ މި މަޝްރޫޢުގެ %95 އަށްވުރެ ގިނަ މަސައްކަތް ވޭތުވެދިޔަ 18 މަސްދުވަހުގެ ތެރޭގައި ނިމިފައިވަނީ، ސަރުކާރުން ފޯކަސްކޮށްގެން ކުރި ޕްލޭނިންގ އާއި އެގްޒެކެޝަންގެ ސަބަބުން ކަމަށެވެ.
މި ބިޔަ މަޝްރޫޢަކީ 32 ޓަވަރަށް ބަހާލައިގެން، އިންޑިއާގެ ކުންފުނި ކޭޕީއައިއެލް އާއި އެންބީސީސީގެ ބެލުމުގެ ދަށުން ކުރިއަށްދާ މަޝްރޫޢެކެވެ.
މިހާރުގެ ސަރުކާރު ވެރިކަމާއި ހަވާލުވުމާއެކު، ކޮންޓްރެކްޓަރުންނާއި ފަހި ދިރިއުޅުން ކޯޕަރޭޝަން (އެފްޑީސީ) އަށް ވެސް ވަނީ މަސައްކަތުގެ ދުވެއްޔާއި ފެންވަރަށް އިސްކަންދިނުމަށް އަންގާފައެވެ.
މިނިސްޓަރު ވިދާޅުވީ ފްލެޓްތައް ޙަވާލުކުރުން ލަސްވުމަކީ ކުރީގެ ސަރުކާރު ނާކާމިޔާބުވުމުގެ ސީދާ ނަތީޖާއެއް ކަމަށެވެ. މިހާރު ސްޓެލްކޯ އާއި އެމްޑަބްލިއުއެސްސީއާއި ގުޅިގެން ޔުޓިލިޓީ ހިދުމަތްތައް ފްލެޓްތަކަށް ގުޅުވައިދިނުމުގެ މަސައްކަތް ކުރަމުންދާއިރު، ފްލެޓްތައް ޙަވާލުކުރުން އަންނަ ޖުލައި މަހު ފެށޭނެއެވެ. އަދި މި މަސައްކަތް ސެޕްޓެމްބަރާއި ހަމައަށް މަރުހަލާތަކަކަށް ބަހާލައިގެން ކުރިއަށްދާނެ ކަމަށް ވެސް މިނިސްޓަރު ވިދާޅުވިއެވެ.
