އީރާނުން މިއަދު އިސްރާއީލަށް ދިން ރައްދު ހަމަލާތަކަކީ އާދަޔާ ޚިލާފަށް ބާރުގަދަ ހަމަލާތަކެއް ކަމަށް އިސްރާއީލުގެ އަސްކަރިއްޔާއިން އެއްބަސް ވެއްޖެއެވެ. އަޑަށްވުރެ 16 ގުނަ ބާރަށް ދަތުރުކުރާ ދެވައްތަރެއްގެ ހައިޕަސޮނިކް މިސައިލް ބޭނުންކޮށްގެން އީރާނުން ދިން މި ހަމަލާތައް މަތަކުރުމުގައި އިސްރާއީލުގެ 6 ބާވަތުގެ ދިފާއީ ނިޒާމުތައްވެސް ވަނީ މުޅިން ފެއިލްވެފައެވެ.

އީރާނުގެ މި ހަމަލާތަކުގައި އިސްރާއީލުގެ ވެރިރަށް ތެލްއަވީވަށާއި ބިރް އައްސަބަޢު ސިޓީއަށް ބޮޑެތި ގެއްލުންތަކެއް ލިބިފައިވެއެވެ. އީރާނުގެ ބާރުގަދަ އެތައް މިސައިލަކުންވަނީ އިސްރާއީލުގެ ބައެއް އުސް އިމާރާތްތައް ބިމާހަމަކޮށްލާފައެވެ. އަނެއްބައި އިމާރާތްތައްވަނީ ދެން އެތަންތަނުގައި ބަޔަކަށް ދިރިނޫޅެވޭ ވަރަށް ފުނޑާލާފައެވެ. ފުނޑާލި ބޮޑެތި އިމާރާތްތަކުގެ ތެރޭގައި ތެލްއަވީވުގައި ހުންނަ އިސްރާއީލުގެ ސްޓޮކްމާކެޓް އިމާރާތާއި، އިސްރާއީލުގައި އިންވެސްޓްކޮށްގެން އުޅޭ ބޭރުގެ ބޮޑެތި ކުންފުނިތަކުގެ އޮފީސްތައް ހުންނަ 50 ބުރީގެ އިމާރާތަކާއި، ބިރް އައްސަބަޢުގައި ހުންނަ ޔަހޫދީ އަސްކަރިއްޔާގެ ޖާސޫސީ މައި މަރުކަޒު ހިމެނެއެވެ.

އީރާނުގެ ބަޔާނެއް ބުނާގޮތުން، މި ޖާސޫސީ މަރުކަޒު ފުނޑާލުމަށް ދިން ވަރުގަދަ ހަމަލާގައި އެތާނގެ ކައިރީގައި ހުންނަ އިސްރާއީލު ސިފައިންގެ އަސްކަރީ ހޮސްޕިޓަލަށްވެސް ބޮޑެތި ގެއްލުންތަކެއް ލިބި، އެ ހޮސްޕިޓަލް ވަރަށް ބޮޑަށް ހަލާކުވެފައިވެއެވެ. ރިޕޯޓްތައް ބުނާގޮތުން މި ހަމަލާގެ ސަބަބުން އެ ހޮސްޕިޓަލްގައި ތިބި ބަލި މީހުންނާއި ޑޮކްޓަރުންނާއި ނަރުހުންގެ ތެރެއިން އެތައް ބަޔަކު ޒަޚަމްވިއެވެ.

އީރާނުގެ ހަމަލާތަކުގައި އިސްރާއީލުގެ 137 މީހަކު ޒަޚަމްވެފައިވާއިރު، ފުރާނަ ސަލާމަތް ކުރަން ދަތިވާވަރަށް 20 މީހަކު ޒަޚަމްވެފައިވާކަމަށް އިސްރާއީލުގެ މީޑިއާ ރިޕޯޓްތައް ބުނެއެވެ. އީރާނުން އަމިއްލަ ނަފްސުގެ ދިފާއުގައި ދޭ ހަމަލާތަކުގައި އަދި މަރުވިކަމަށް އިސްރާއީލު އެއްބަސްވެފައިވަނީ އެންމެ 26 މީހުންނެވެ. ނަމަވެސް އީރާނުގެ ހަމަލާތަކުގައި އިސްރާއީލުގެ 100 އަށް ވުރެ ގިނަ މީހުން މަރުވެފައިވާކަމަށް ނުރަސްމީ ރިޕޯޓްތައް ބުނެއެވެ.