ފަޟީލަތުއްޝައިޚް އިބްރާހީމް ފަރީދު އަޙްމަދުގެ ހަނދާނުގައި ޚިދުމަތް ޖަމްޢިއްޔާއިން އިސްނަގައިގެން ބިނާކުރުމަށް މަސައްކަތްކުރާ މިސްކިތް ޢިމާރާތް ކުރުމަށް ގްރޭޓާ މާލެ އޭރިއާއިން ބިން ހަމަޖައްސަވައިދެއްވާނެ ކަމަށް ރާއްޖޭގެ މަޝްހޫރު ފިޤްހް ޢިލްމުވެރިޔާ އަދި އިސްލާމިކް މިނިސްޓަރު ޑރ މުޙައްމަދު ޝަހީމް ޢަލީ ސަޢީދު ޔަޤީންކަން ދެއްވައިފި ކަމަށް ޚިދުމަތް ޖަމްޢިއްޔާއިން ދެންމެ ބުނެފިއެވެ.

މި ޖޫން މަހުގެ 9 ވަނަ ދުވަހު ކުއްލި ގޮތަކަށް ޝައިޚް ފަރީދު އަވަހާރަވުމާއި ގުޅިގެން އިސްލާމިކް މިނިސްޓަރު ޝަހީމް ވަރަށް ބޮޑަށް ހިތާމަ ފާޅުކުރެއްވިއެވެ. އަދި ޖަނާޒާގެ ކަންތަކުގައި ވެސް ޢަމަލީ ގޮތުން އުޅުއްވިކަން އެ ޖަމްޢިއްޔާއިން ފާހަގަ ކުރެވެއެވެ.

ޚިދުމަތް ޖަމްޢިއްޔާ ހިންގުމާއި ޙަވާލުވެ ހުންނެވި އިސްވެރިޔާ ޝާމީ ރަޝާދު ދެންމެ ޚުލާޞާ އާއި ވާހަކަ ދައްކަވަމުން ވިދާޅުވީ، ދީނީ ކަންކަމުގައި އަދި ވަކިން ޚާއްޞަކޮށް މިސްކިތް ބިނާކުރުމަށް ޑރ. ޝަހީމް އަކީ އަބަދުވެސް ވަރަށް ބޮޑު އަހަންމިއްޔަތުކަމެއް ދެއްވާ ބޭފުޅެއް ކަމަށާއި، އެފަދަ ބޭފުޅަކު އިސްލާމިކް މިނިސްޓަރު ކަމުގައި ހުންނެވުމަކީ ޤައުމުގެ މުސްތަޤްބަލް ބިނާ ކުރުމަށް ލިބޭ ވަރަށް ބޮޑު ހިއްވަރެކެވެ. ޝައިޚް ފަރީދުގެ ޖަނާޒާގެ ކަންތައްތައް ފުރިހަމަކުރެއްވުމަށް ސަރުކާރުން ކުރެއްވި މަސައްކަތްތައް ޚިދުމަތް ޖަމްޢިއްޔާއިން ވަރަށް އިޚްލާޞްތެރިކަމާއެކު ފާހަގަކުރައްވައި އެކަމަށްޓަކައި ޝުކުރުވެސް އަދާކުރައްވާފައި ވެއެވެ.

^{ޚިދުމަތް ޖަމްޢިއްޔާގެ ފޭސްބުކް ޕޭޖުން ނަގާފައި.}

ޝާމީ ރަޝާދު ވިދާޅުވީ ޝައިޚް ފަރީދުގެ ހަނދާނީ މިސްކިތުގެ ޖާގަ އަކީ އެއްފަހަރާ 2500 މީހުންނަށް ނަމާދު ކުރެވޭ މިންވަރެވެ. މި މިސްކިތް ޢިމާރާތްކުރަން ނިންމާފައިވަނީ ދެފަންގިފިލާއަށް ކަމަށާއި، މި މިސްކިތަކީ ދީނީ ޢިލްމު ފަތުރައިދޭ ސެންޓަރަކަށް ވެގެންދާނެ ކަމަށެވެ.

“އަޅުގަނޑުމެން މި މިސްކިތުގައި ލައިބްރަރީއާއި ކްލާސްރޫމްތައް ހަދާނަން އިނގޭތޯ. އެއީ ޢަރަބި ބަހާއި ކީރިތި ޤުރުއާން އުނގަންނައިދިނުމަށް، ޑރ. ޝަހީމް އަޅުގަނޑުމެންނަށް މިއަދު ޔަޤީންކަން ދެއްވީ ގްރޭޓާ މާލެ އޭރިއާއިން މިސްކިތް ބިނާކުރުމަށް (ޝައިޚް ފަރީދުގެ ހަނދާނީ މިސްކިތް) ބިން ހަމަޖައްސަވައިދެއްވާނެ ކަމަށް… މި މިސްކިތުގައި އެއްވެސް ދަތިކަމެއް ނެތި އެއްފަހަރާ 2500 މީހުންނަށް ނަމާދު ކުރެވޭނެ” ޝާމީ ރަޝާދު ވިދާޅުވިއެވެ.

ޚިދުމަތް ޖަމްޢިއްޔާއާއެކު މިއަދު އިސްލާމިކް މިނިސްޓްރީން ބޭއްވި ބައްދަލުވުމުގައި ބުނީ، މިސްކިތް ޢިމާރާތް ކުރުމުގައި ހުރިހާ އެއްބާރުލުމެއްވެސް ދޭނެ ކަމަށެވެ.

ޚިދުމަތް ޖަމްޢިއްޔާއިން ވަނީ ބަންގްލަދޭޝްގައި ވެސް ޝައިޚް ފަރީދުގެ ހަނދާނުގައި މިސްކިތެއް ބިނާކުރުމަށް ނިންމާފައެވެ. އެ މިސްކިތުގެ ބިންގާ އަޅުއްވައިދެއްވާނީ ނޫރުލްޤުރްއާން ހިންގާ އުސްތާޛް އިބްރާހިމް ފައުޒީ އާއި ޝައިޚް ފަރީދުގެ ޢާއިލާއިން ކަމަށް އެ ޖަމްޢިއްޔާއިން ބުންޏެވެ.

ދުނިޔޭގެ އެކިކަންކޮޅުތަކުގައި މިސްކިތްތައް ޢިމާރާތްކުރަމުންދާ ޚިދުމަތް ޖަމްޢިއްޔާ އަކީ ޤަވާޢިދުން އަހަރީ ރިޕޯޓް ސަރުކާރުގެ ކަމާބެހޭ ފަރާތަށް ހުށަހަޅާ ޖަމްޢިއްޔާއެއްކަން ވެސް ފާހަގަ ކުރެވެއެވެ.

ހުސްވި އަހަރު އެކަނިވެސް އެ ޖަމްޢިއްޔާއިން ވަނީ 7.5 މިލިއަން ރުފިޔާ ޣައްޒާ ރައްޔިތުންނަށް ޚަރަދު ކޮށްފައެވެ. ރާއްޖޭގައި ހިންގި ޙަރަކާތްތަކަށް 3.4 މިލިއަން ރުފިޔާ ޚަރަދުކުރިއިރު ސީރިއާ، ބަންގްލަދޭޝް، ޓެންޒޭނިއާ، އަފްޣާނިސްތާން، ޕާކިސްތާން އަދި ޔަމަނާއި އިންޑިއާގެ މުސްލިމުންނަށް 8 މިލިއަނަށްވުރެ ގިނަ ރުފިޔާ ޚަރަދުކޮށްފައިވާކަން ފާހަގަ ކުރެވެއެވެ.