ދިވެހި ޑޮކްޓަރުންނަށް ދަރިމައިވުމާ ގުޅޭ ތަމްރީނު ސްކޮލަރޝިޕްތަކެއް ހަމަޖެހިފައިވާ ކަމަށް ފަސްޓްލޭޑީ ސާޖިދާ މުހައްމަދު ހާމަކުރައްވައިފިއެވެ.
ސާޖިދާ މިފަދައިން ވިދާޅިވީ ދުބާއީގައި ކުރިޔަށް ގެންދިޔަ މެކް ފައުންޑޭޝަން ފަސްޓް ލޭޑީސް އިނިޝިއޭޓިވް (އެމްއެފްއެފްއެލްއައި)ގެ ހަތްވަނަ ސަމިޓުގައި ވާހަކަފުޅު ދައްކަވަމުންނެވެ.
ސާޖިދާ ވިދާޅުވީ ދަރިމައިވުމާ ގުޅޭ ދާއިރާތަކަށް ހާއްސަ ޑޮކްޓަރުން މަދުވުމުގެ ދަތިކަން ރާއްޖޭގައި ދިމާވެފައިވާ ކަމަށާއި މި މައްސަލަ ހައްލުކުރުމަށް ދިވެހި ޑޮކްޓަރުންނަށް އެ ދާއިރާއިން ސްކޮލާޝިޕްތައް ހަމަޖެހިފައިވާ ކަމަށެވެ. އަދި ރާއްޖޭގައި އަގުހެޔޮ އަދި ފެންވަރު ރަނގަޅު ސިއްހީ ނިޒާމެއް ޤާއިމުކުރުމަށް މަސައްކަތްތަކެއް ކުރަމުންދާކަން ފާހަގަކުރައްވަމުން، ސިއްހީ ދާއިރާ އިތުރަށް ހަރުދަނާ ކުރުމަށް ދިގު މުއްދަތުގެ ޓެކްނިކަލް ޕާޓްނަޝިޕްތައް ގާއިމުކުރުމަށް ޝައުގުވެރިކަން ހުރިކަމަށްވެސް ވިދާޅުވިއެވެ.
މީގެ އިތުރުން، ދިމާވާ ގިނަ ސިއްހީ މައްސަލަތައް ހައްލުކުރުމަށް މުޖުތަމައުގެ ހޭލުންތެރިކަން އިތުރުކުރުމަށާއި ކެންސަރު ސްކްރީނިން އާއި ނަފްސާނީ ސިއްހަތާއި ގުޅުންހުރި ހިދުމަތްތައް ރަނގަޅުކުރުމުގެ އިތުރުން ސިއްހީ ދާއިރާގައި އަންހެނުންގެ ލީޑާޝިޕަށް އެހީތެރިވުމާއި ގުޅޭގޮތުން ސާޖިދާ ވާހަކަފުޅުދައްކަވާފައިވެއެވެ.
ސާޖިދާ ވަނީ މެކް ފައުންޑޭޝަނުގެ "މޯ ދެން އަ މަދާ" ކެމްޕެއިނުގެ އެމްބެސެޑަރަކަށް ހަމަޖެހިވަޑައިގެންފައެވެ. އަދި މީގެ ކުރިން މި ފައުންޑޭޝަނާ ގުޅިގެން ދަރިމައިވުމާ ގުޅޭ މައްސަލަތަކާއި، ޖިންސީ ތަފާތުކުރުންތަކާ ގުޅޭ އަނިޔާއާއި، އަންހެނުން ބާރުވެރިކުރުވުމާއި، އަދި ހަކުރު ބައްޔާއި ހައިޕަޓެންޝަން ފަދަ މައްސަލަތަކަށް ހޭލުންތެރިކުރުމުގެ ޕްރޮގްރާމްތަކެއް ހިންގާފައިވާ ކަމަށްވެސް ސާޖިދާ ވިދާޅުވިއެވެ.
މި ސަމިޓަކީ އެފްރިކާ އަދި އޭޝިޔާގެ ޤައުމުތަކުގެ ފަސްޓް ލޭޑީން ބައިވެރިވެވަޑައިގަންނަވާ ދެ ދުވަހުގެ ސަމިޓެކެވެ.
