އިސްރާއީލުން އިސްވެ އޮވެ އީރާނަށް ޙަމަލާ ދިނުމާއި ގުޅިގެން މިހރު ކުރިޔަށްދާ ހަނގުރާމައިގައި ޔަމަނުގެ ހޫޘީން އީރާނާއި ގުޅޭނެ ކަމަށް ސިގްނަލް ދީފިއެވެ. ޔަމަނުން މިހެން ބުނީ އިސްރާއީލް ދިފާޢު ކުރުމަށް އެމެރިކާގެ މަނަވަރުތަކާއި ޖެޓް ތައް ރުކުރުވާލުމާއި ގުޅިގެންނެވެ.

އިސްރާއީލުން އެދެނީ ހަނގުރާމައިގައި އެމެރިކާ ބައިވެރިވުމެވެ. އަދި އެމެރިކާއިން ސީދާގޮތެއްގައި އީރާނަށް ޙަމަލާ ދިނުމަށެވެ. ނަމަވެސް އެމެރިކާއިން ރަސްމީ ސިފައިގައި ހަނގުރާމަޔަށް ވަނުމަށް މިހާތަނަށް އެއްބަސްވެފައެއް ނުވާ ކަމަށް މަސްދަރުތަކުން ބުނެއެވެ.

^{މެދުއިރުމަތީގައި ހުރި އެމެރިކާގެ ބޭސްތައ / ފޮޓޯ: އަލްޖަޒީރާ.}

ޔަމަނުގެ ހޫޘީން މިއަދު އިއުލާން ކުރި ގޮތުގައި އިސްރާއީލާއި ދެކޮޅަށް ކުރާ އަސްކަރީ ކެމްޕޭނުގައި އީރާނަށް ފުރިހަމަޔަށް ވާގި ދޭނެ ކަމަށާއި ސަބަބަކީ މިއީ ސަރަޙައްދީ ކަމެއް ކަމަށެވެ.

ހޫޘީންގެ އިސް އޮފިޝަލް މުޙައްމަދު އަލް ބުޚައިތީ ވިދާޅުވީ ޣައްޒާގައި ފަލަސްތީނުގެ ރައްޔިތުންނާއި މެދު މިހާރުވެސް ދެއްކި އެއްބައިވަންތަކަން ކުރިއަށް ގެންދަވައި، އީރާނާއެކު އެ ޖަމާއަތުން "ތަދައްޚުލްވާން ތައްޔާރަށް" އޮތް ކަމަށެވެ.

ތާރީޚީ ގޮތުން ބަލާއިރު، އޮކްޓޯބަރ 2023 އިން ފެށިގެން ހޫޘީން ވަނީ އެތައް ޑްރޯން އަދި މިސައިލް ހަމަލާތަކެއް އިސްރާއީލަށް ދީފައެވެ. އަދި ރެޑް ސީ ޝިޕިން ލޭންތަކަށް އަމާޒުކޮށް، އީރާނުގެ އައިއާރުޖީސީ އާއި ހިޒްބުالله އާއި އެކު ޖާސޫސީ އަދި ހަތިޔާރު ފޯރުކޮށްދިނުމުގެ އޮޕަރޭޝަންތަކުގައި ކޯޑިނޭޓް ކުރުމުގެ މަސައްކަތްވެސް ކޮށްފައި ވެއެވެ. މިމައްސަލައިގައި ޚުދު އެމެރިކާއިން ޔަމަނަށް ބޮން ވެސް އެޅިއެވެ. ނަމަވެސް ޔަމަނުގެ ޙަމަލާތަކުގެ ކުރިމަތީގައި އެމެރިކާ މުޅިން ނާކާމިޔާބުވިއެވެ. އެމީހުންގެ ފައިޓަރ ޖެޓްތަކާއި މަނަވަރަށް ހޫޘީން ޙަމަލާދީ ބޮޑެތި ގެއްލުންތަކެއް ދިނުމުން ލަދުން ބޮލުފޮށަ އަޅަންޖެހޭތީ އެމެރިކާއިން އެސަރަޙައްދުން ދުރަށް ދިޔައެވެ.

މުޙައްލިލުން ބުނާ ގޮތުގައި ހޫޘީން އީރާނާއެކު ނުކުތުމުން، މިހާރު ވެސް ޓެސްޓް ކޮށްފައިވާ އީރާނުގެ އާ ހައިޕަރސޮނިކް މިސައިލްތަކުން އިސްރާއީލުގެ ވައިގެ ދިފާޢީ ނިޒާމުތަކަށް ވަރަށް ބޮޑަށް ދަތިވާނެއެވެ.