ކޮތަޅަކަށް މަސްތުވާތަކެތި އަޅައިގެން އުޅުނު މީހަކު ހުޅުމާލެއިން ރޭ ހައްޔަރުކޮށްފި އެވެ.
ފުލުހުން މިއަދު ބުނީ މަސްތުވާތަކެތި ކަމަށް ޝައްކުކުރެވޭ އެއްޗެއް ހުރި ރަބަރު ޕެކެޓަކާއެކު މީހަކު ހުޅުމާލެއިން ހައްޔަރުކޮށްފައިވާ ކަމަށެވެ.
މި މައްސަލައާ ގުޅިގެން ހައްޔަރުކޮށްފައި ވަނީ އދ. މާމިގިލި، ފުނަމާގެ، މުހައްމަދު އާލިމް، 22 އެވެ.
ފުލުހުން ބުނީ އޭނާ ހައްޔަރުކޮށްފައި ވަނީ ރޭ ދަންވަރު 1 ޖަހަނިކޮށް ހުޅުމާލެ ފޭސް 2 ގައި ހުންނަ ވިނަރެސް 7 ގެ ގްރައުންޑް ފްލޯ ޕާކިން ޒޯނަށް ސައިކަލެއްގައި ވަދެ ފުލުހުން ފެނުމުން އަވަސްއަވަހަށް ސައިކަލް ޕާކްކޮށްފައި ދާން މަސައްކަތްކުރުމުން އޭނާގެ އަމަލުތައް ހުރިގޮތުން ޝައްކުވެގެން ބެލުމުން ކަމަށެވެ.
އޭނާ ހުއްޓުވައި ބަލައި ފާސްކުރި އިރު އޭނާގެ އަތުގައި އޮތް ކޮތަޅެއްގެ ތެރެއިން މަސްތުވާތަކެތި ކަމަށް ޝައްކުކުރެވޭ އެއްޗެއް ހުރި ރަބަރު ޕެކެޓެއް ފެނިފައިވާ ކަމަށް ފުލުހުން ބުންޏެވެ.
ފުލުހުން ބުނީ އޭނާ ގެންގުޅުނު ކޮތަޅު ތެރެއިން ފެނުނު މަސްތުވާތަކެތި ކަމަށް ޝައްކުކުރެވޭ އެއްޗެއް ހުރި ރަބަރު ޕެކެޓްގެ ވަގުތީ ބަރުދަނަކީ 259 ގްރާމް ކަމަށެވެ.
މިތަކެތީގެ ބަރުދަނަށް ބަލާއިރު މިމައްސަލައިގެ ކުށް އޭނާގެ މައްޗަށް ސާބިތުވެއްޖެނަމަ 1 ލައްކަ ރުފިޔާއިން ޖޫރިމަނާ ކުރުމާއެކު 25 އަހަރަށް ޖަލަށް ލެވޭނެއެވެ.
