ވޭޕާއި ގުޅުންހުރި އެކިއެކި މައްސަލަތަކުގައި 35 މީހަކު ހުސްވި މޭމަހު ޖޫރިމަނާ ކޮށްފިއެވެ.
ފުލުހުންގެ ޚިދުމަތުން ހާމަކުރި މަޢުލޫމާތުގައިވާ ގޮތުގައި މި މައްސަލަތަކުގައި ޖޫރިމަނާކުރެވުނު ޖުމްލަ އަދަދަކީ 130,000 ރުފިޔާއެވެ.
ފުލުހުންގެ ޚިދުމަތުން ދެއްވި ތަފްޞީލުތަކަށް ބަލާއިރު، މޭ މަހުގެ 1 އިން 31 އަށް ވޭޕް ބޭނުންކުރުމުގެ މައްސަލައިގައި 13 މީހަކު 53,000 ރުފިޔާއިން ޖޫރިމަނާކޮށްފައިވެއެވެ. މީގެ އިތުރުން، ވޭޕް ގެންގުޅުމުގެ މައްސަލައިގައި 20 މީހަކު 67,000 ރުފިޔާއިން ޖޫރިމަނާކުރެވުނެވެ. އަދި ވޭޕާ ގުޅުންހުރި އެހެނިހެން މައްސަލަތަކުގައި 2 މީހަކު 10,000 ރުފިޔާއިން ޖޫރިމަނާ ކޮށްފައި ވެއެވެ.
ރާއްޖޭގައި ވޭޕް ބޭނުންކުރުމާއި، ވިއްކުމާއި، ހިލޭ ބެހުން މަނާކުރާ ޤާނޫނަށް ޢަމަލުކުރަން ފެށީ 2022 ވަނަ އަހަރުގެ ޑިސެންބަރު 15 ވަނަ ދުވަހުން ފެށިގެންނެވެ. މި ޤާނޫނުގެ ދަށުން، ވޭޕްގެ ބާވަތްތައް ރާއްޖެއަށް އެތެރެކުރުމުން 50,000 ރުފިޔާއިން ޖޫރިމަނާކުރެވޭނެއެވެ. އަދި އެތެރެކުރާ ކޮންމެ ވޭޕަކަށް 10,000 ރުފިޔާގެ މަގުން އިތުރު ޖޫރިމަނާއެއް ކުރެވޭނެއެވެ.
ފުލުހުންގެ ޚިދުމަތުން ވަނީ ރައްޔިތުންނަށް އިލްތިމާސްކޮށް، ދުންފަތް ކޮންޓްރޯލްކުރުމާބެހޭ ޤާނޫނަށް ފުރިހަމައަށް ޢަމަލުކުރުމަށާއި، ޤާނޫނު ތަންފީޒުކުރުމުގައި ފުލުހުންނަށް އެއްބާރުލުން ދިނުމަށް ގޮވާލާފައެވެ. ޤާނޫނާއި ޚިލާފުވާ ފަރާތްތަކަށް ޖޫރިމަނާ ދެއްކުމަށް ވާރު ޕޭގެ ޕޭމަންޓް ލިންކެއް ހިމެނޭ މެސެޖެއް ފޮނުވޭނެކަމަށްވެސް ފުލުހުން ވަނީ ހާމަކޮށްފައެވެ.
