ސޯޝަލް ހައުސިންގ ސްކީމްތަކުގެ ދަށުން ހުޅުމާލެއިން ދޫކޮށްފައިވާ ފްލެޓްތަކަށް ކުލި ނުދައްކާ މީހުންނަށް ނޯޓިސް ފޮނުވަން ފަށައިފިއެވެ.
ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ބުނީ މިފަހުން ގެނައި ބަދަލަކާ އެކު، ފްލެޓްތަކަށް ކުލި ނުދައްކާ މީހުންނަށް ކޮންމެ ތިން މަހަކުން ނޯޓިސް ފޮނުވަން ފަށާފައިވާ ކަމަށެވެ. އެ ނޯޓިސް އަކީ ކުލި ދައްކަން ނަސޭހަތް ދީ ފޮނުވާ "ޕޭމަންޓް އެޑްވައިސް" ނޯޓިސްއެއް ކަމަށް އެޗްޑޯސީން ބުންޏެވެ.
ހުޅުމާލޭގެ ފްލެޓްތަކުން ކުލީގެ ގޮތުގައި ނުލިބިވާ ފައިސާގެ އަދަދު 700 މިލިއަން ރުފިޔާއަށް ވުރެ ގިނައެވެ. އަދި އެންމެ ފްލެޓަކުން އެކަނި ވެސް އެއް މިލިއަން ރުފިޔާގެ ކުލި ނުދައްކާ އެބަ އޮތެވެ.
އެޗްޑީސީން ހުޅުމާލޭގައި 8،511 ހައުސިންގ ޔުނިޓުތައް ބަލަހައްޓާއިރު، އޭގެ ތެރެއިން ޤަވާޢިދުން ކުލި ދައްކަނީ އެންމެ 3،219 ފްލެޓަކުންނެވެ އަދި 5،099 ފްލެޓަކުން ކުލި ނުދައްކައެވެ. އޭގެ ތެރޭގައި ފްލެޓުތަކަށް ވަން ފަހުން އެއްގޮތަކަށް ވެސް ކުލި ނުދައްކާ މީހުންވެސް ހިމެނެއެވެ.
ހުޅުމާލެއިން ދޭ ސޯޝަލް ހައުސިންގ ޔުނިޓުތަކުގެ އެއްބަސްވުންތަކުގައިވާ ގޮތުން ޤަވާޢިދުން ކުލި ނުދައްކާ ނަމަ، ފްލެޓު އަތުލުމުގެ ބާރު އެ ކުންފުންޏަށް ލިބިގެންވާ ނަމަވެސް މިހާތަނަށް އެއްވެސް ފްލެޓެއް ކުލި ނުދައްކައިގެން އަތުލާފައެއް ނުވެއެވެ.
އެކި ހައުސިންގ މަޝްރޫއުތަކުގެ ދަށުން ހުޅުމާލެއިން ދޫކޮށްފައިވާ ފްލެޓްތަކުގެ ކުލި ވެސް މި ސަރުކާރުން ކުޑަކޮށްދީފައިވާކަން ފާހަގަކޮށްލެވެއެވެ. ހިޔާ ފުލެޓަށް މިހާރު ދައްކަންޖެހެނީ 5،000 ރުފިޔާއަށްވުރެ ކުޑަ ޢަދަދެކެވެ. އަދި ފުރަތަމަ ފިޔަވަހީގައި ހުރި ފުލެޓުތަކަށް ދައްކަން ޖެހެނީ 6،500 ރުފިޔާއެވެ.
