މިއަދު ހެނދުނު ވެލާނާ އިންޓަނޭޝަނަލް އެއާޕޯޓުން ހދ. ކުޅުދުއްފުއްޓަށް ދަތުރުކުރި މޯލްޑިވިއަންގެ ބޯޓެއް، ވައިގަދަވުމުގެ ސަބަބުން އެ ރަށަށް ނުޖެއްސި އެނބުރި މާލެ އައިސްފިއެވެ.

މޯލްޑިވިއަންގެ ފްލައިޓު Q2442 ވެލާނާ އެއާޕޯޓުން ކުޅުދުއްފުށީ އެއާޕޯޓަށް ފުރީ މިއަދު ހެނދުނު 8:34 ގައެވެ. ހެނދުނު 9:20 ގައި ކުޅުދުއްފުށީ އެއާޕޯޓަށް ޖައްސަން އޮތް އެ ބޯޓަށް، ވައިގަދަވުމުގެ ސަބަބުން އެ އެއާޕޯޓުގައި ނުޖެއްސި، ގިނައިރު ވައިގެ މަތީގައި އުދުހެން ޖެހުނެވެ.

އޭޓީއާރު 72-600 މަރުކާގެ އެ ބޯޓު އެނބުރި މާލެ އައީ ދެގަޑިއިރެއްހާއިރު އުދުހުމަށްފަހު، މިއަދު ހެނދުނު 11 ޖަހާއިރުހާއިރުއެވެ. ވައިގެމަގުން މާލެއިން ކުޅުދުއްފުށްޓަށް އާންމުކޮށް ދެވެނީ 40-45 މިނެޓުންނެވެ.

ރާއްޖޭގެ މޫސުމާބެހޭ އިދާރާއިން ވަނީ ބޯކޮށް ވާރޭވެހި، ވައިގަދަވާނެ ކަމަށް ލަފާކޮށް، ކުޅުދުއްފުށި ހިމެނޭ ސަރަހައްދަށް ވައިޓް އެލާޓް ނެރެފައެވެ. މި އެލާޓް ނެރުނީ ހއ. އިން ފެށިގެން ޅ. އަތޮޅަށް މިއަދު ހެނދުނު 11:45 އިން ހަވީރު 4:00 ގެ ނިޔަލަށެވެ.

މެޓް އޮފީހުން މަޢުލޫމާތު ދިންގޮތުގައި، އެ ސަރަހައްދަށް ވައިޖެހޭނީ އާންމު ގޮތެއްގައި ގަޑިއަކު 19 މޭލާއި 24 މޭލާ ދެމެދުގެ ބާރުމިނުގައެވެ. އަދި ވިލާގަނޑުގައި 40 މޭލަށް ވައިގަދަވުން އެކަށީގެންވާ ކަމަށްވެސް އެ އޮފީހުން ބުނެފައިވެއެވެ.