މިއަހަރުގެ ރަމަޟާން މަހު އުމްރާގެ މަތިވެރި އަޅުކަން އަދާކުރުމަށް އެކި ކުންފުނިތަކާއެކު ފުރަން ތައްޔާރުވެ، ނަމަވެސް ދިމާވި އެކި ސަބަބުތަކާހުރެ ނުފުރި ތިބި ފަރާތްތަކަށް ހާއްސަ އިންތިޒާމެއް ހަމަޖެއްސުމުގެ މަސައްކަތް ސަރުކާރުން ފަށައިފިއެވެ.
އިސްލާމިކް މިނިސްޓްރީން ބުނީ މި އިސްނެގުމަކީ، އެކި އެޖެންސީތައް މެދުވެރިކޮށް އުމްރާއަށް ދިއުމަށް ރާވާފައިވާ ފަރާތްތަކުގެ ތެރެއިން، ބައެއް ގައުމުތަކުން ޓްރާންސިޓްވެގެން ދަތުރުކުރަން އުޅުނު ނަމަވެސް ފްލައިޓްތައް ކެންސަލްވުމުގެ ސަބަބުން ދަތިތަކާ ކުރިމަތިވި އުމްރާވެރިންނަށް އެހީތެރިވުމުގެ ގޮތުން ކުރިއަށްގެންދާ މަސައްކަތެކެވެ.
އަދި މި ފަރާތްތަކަށް އުމްރާގެ އަޅުކަން އަދާކުރެވޭނެ މަގެއް ދައްކަވައި، އެކަން ހަމަޖައްސައިދެއްވުމަށް ރައީސް ޑރ. މުޙައްމަދު މުޢިއްޒު ކަމާގުޅޭ އިދާރާތަކަށް ރޭ އިރުޝާދު ދެއްވާފައިވާ ކަމަށް މިނިސްޓްރީ އިން ބުންޏެވެ.
ރައީސްގެ އިރުޝާދާ އެއްގޮތަށް، މިނިސްޓްރީ އޮފް އިސްލާމިކް އެފެއާޒާއި، މޯލްޑިވްސް ހައްޖު ކޯޕަރޭޝަން އަދި ގައުމީ އެއާލައިން، މޯލްޑިވިއަން ގުޅިގެން މިހާރު ވަނީ މިކަމަށް ބޭނުންވާ އަމަލީ މަސައްކަތްތައް ފަށާފައެވެ.
މިކަމާ ގުޅޭގޮތުން އިސްލާމީ ކަންތައްތަކާ ބެހޭ ވަޒީރު ޑރ. މުހައްމަދު ޝަހީމް އަލީ ސައީދު ވިދާޅުވީ، މިހާތަނަށް ލިބިފައިވާ މައުލޫމާތަށް ބަލާއިރު ފުރަން ބޭނުންވެފައި ތިބި މީހުންގެ އަދަދު 150 އަށް އަރާ ކަމަށެވެ. އަދި ފްލައިޓް ޗާޓަރު ކުރެވޭނެ ގޮތެއް ހަމަޖެހިއްޖެނަމަ، ޖާގަ އޮތް މިންވަރަކުން އިތުރު ފަރާތްތަކަށްވެސް އެ ފުރުސަތު ދެއްވާނެ ކަމަށް ވަޒީރު ވިދާޅުވިއެވެ. ރަމަޟާން މަސް ނިމެން ގާތްވެފައިވާތީ، މިކަމަށް އަވަސް ހައްލެއް ހޯދުމަށް ޓަކައި ބާރު ސްޕީޑުގައި މަސައްކަތްތައް ކުރިއަށްދާކަންވެސް ވަޒީރު ފާހަގަކުރެއްވިއެވެ.
މީގެ އިތުރުން ވަޒީރު ވިދާޅުވީ، މި ދަތުރު ހަމަޖެހިއްޖެ ހިނދެއްގައި، ދަތުރަށްދާ ހަރަދުތައް އާންމު އުސޫލުން ހަމަޖައްސާނީ އުމްރާވެރިން އަމިއްލައަށް ކަމަށެވެ.
