އަންހެނުންނަށް ޚާއްޞަކޮށްގެން ދޫކުރާ "ފަށާ މަދަދު" ލޯނު ސްކީމްގެ ދެވަނަ ފިޔަވަހީގެ ދަށުން ލޯނަށް އެދުމުގެ ފުރުޞަތު މިއަދުން ފެށިގެން ހުޅުވާލައިފައިވާކަމަށް އެސްއެމްއީ ޑިވެލޮޕްމެންޓް ފައިނޭންސް ކޯޕަރޭޝަން (އެސްޑީއެފްސީ) އިން މިއަދު ހާމަކޮށްފިއެވެ.
މި ލޯނު ސްކީމްގެ ދަށުން އަހަރަކު 6 އިންސައްތައިގެ އިންޓްރެސްޓާއެކު، އަލަށް ވިޔަފާރި ފަށާ ފަރާތްތަކަށް 100،000 ރުފިޔާއާއި 500،000 ރުފިޔާއާ ދެމެދުގެ ޢަދަދަކަށް ލޯނު ދޫކުރެވޭނެއެވެ. އެސްޑީއެފްސީން ބުނާ ގޮތުގައި ލޯނަށް ގިނަވެގެން 12 މަސްދުވަހުގެ ގްރޭސް މުއްދަތެއް ލިބޭނެއެވެ. އަދި ލޯނު އަނބުރާ ދެއްކުމަށް 7 އަހަރު ދުވަހުގެ މުއްދަތެއް ދެވޭނެއެވެ.
"ފަށާ މަދަދު" ލޯނު ސްކީމްއަށް ޖުމްލަ 100 މިލިއަން ރުފިޔާ ކަނޑައަޅާފައިވާއިރު، ކޮންމެ ފިޔަވައްސަކަށް 20 މިލިއަން ރުފިޔާ ވަނީ ޚާއްޞަކޮށްފައެވެ. އަދި މި ލޯނު ސްކީމްގެ 25 އިންސައްތަ ވަނީ ނުކުޅެދުންތެރިކަން ހުންނަ ފަރާތްތަކަށް ޚާއްޞަކޮށްފައެވެ.
މި ލޯނު ސްކީމްއަކީ އެސްޑީއެފްސީއާއި، އިޤްތިޞާދީ ތަރައްޤީއާއި ވިޔަފާރިއާ ބެހޭ ވުޒާރާގެ އިތުރުން އިޖުތިމާޢީ އަދި އާޢިލީ ތަރައްޤީއާ ބެހޭ ވުޒާރާ ގުޅިގެން ކުރިއަށްގެންދާ ސްކީމެކެވެ. މި ސްކީމްގެ މަޤްޞަދަކީ ވިޔަފާރީގައި ހަރަކާތްތެރިވާ އަންހެނުންނަށް މާލީ އެހީތެރިކަން ފޯރުކޮށްދިނުމެވެ.
"ފަށާ މަދަދު" ލޯނު ސްކީމްއަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެވަޑައިގެންނެވި ވަޢުދެއް ފުއްދުމުގެ ގޮތުން ތަޢާރަފުކުރެވުނު ސްކީމެކެވެ. މި ސްކީމްގެ މައިގަނޑު މަޤްޞަދަކީ ވިޔަފާރީގެ ދާއިރާގައި އަންހެނުން ބާރުވެރިކުރުވުމެވެ.
އެސްޑީއެފްސީން އިތުރަށް ހާމަކުރި ގޮތުގައި "ފަށާ މަދަދު" ލޯނަށް އެދުމުގެ ސުންގަޑިއަކީ އޮގަސްޓް މަހުގެ 31 ވާ އާދީއްތަ ދުވަހެވެ.
