ކޮންޓެންޓް ކްރިއޭޓަރުންނަށް ދޫކުރަން ނިންމި ލޯނަށް ކުރިމަތިލުމުގެ ފުރުސަތު ހުޅުވާލައިފި އެވެ.

ކޮންޓެންޓް ކްރިއޭޓަރުންނަށް ދޫކުރާ ލޯނަށް ކުރިމަތިލުމުގެ ފުރުސަތު ހުޅުވާލިކަން ހާމަކޮށް އެސްއެމްއީ ޑިވޮލޮޕްމަންޓް ފައިނޭންސިން ކޯޕަރޭޝަން (އެސްޑީއެފްސީ)އިން އެކްސްގައި ހިއްސާކުރި ޕޯސްޓެއްގައި ބުނެފައިވަނީ، 25،000 ރުފިޔާއިން ފެށިގެން 500،000 ރުފިޔާއާ ހަމައަށް ލޯނު ދޫކުރާނެ ކަމަށެވެ.

މީގެ އިތުރުން، ރަހުނަކާ ނުލައި، 150,000 ރުފިޔާއާ ހަމައަށް ލޯނު ދޫކުރާނެ ކަމަށް އެސްޑީއެފްސީން ވަނީ ބުނެފަ އެވެ. އެސްޑީއެފްސީން ބުނެފައިވާ ގޮތުގައި، މި ލޯނަކީ ފަސް އަހަރު ދުވަހުގެ ދައްކާ ގޮތަށް ހަމަޖެހިފައިވާ ލޯނެކެވެ. ގްރޭސް ޕީރިއަޑެއްގެ ގޮތުގައި ހަ މަސް ދުވަސް ލިބޭނެކަމަށް ވެސް އެސްޑީއެފްސީން ވަނީ ބުނެފަ އެވެ.

ކޮންޓެންޓް ކްރިއޭޓަރުންނަށް ހާއްސަކޮށް މި ފަދަ ލޯނެއް ދޫކުރުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ވައުދުފުޅެކެވެ. މިކަމާ ގުޅިގެން އެމަނިކުފާނު މީގެކުރިން އެކްސްގައި ހިއްސާކުރެއްވި ޕޯސްޓެއްގައި ވިދާޅުވެފައިވަނީ، މި ލޯނުގެ ފުރުސަތު ހުޅުވާލާފައި ވަނީ، މީޑިއާ ކޮންޓެންޓް، އޯޑިއޯ ވީޑިއޯ އިމޭޖް ޕްރޮޑަކްޝަން، އެންޓަޓެއިންމަންޓްގެ އިތުރަށް ސޭލްސްއާއި މާކެޓިންއަށް ހާއްސަ ކޮންޓެންޓްގެ ދާއިރާއަށް ފުރުސަތު ލިބޭގޮތަށް ކަމަށެވެ.

"މި ލޯން ސްކީމް ގެ މަޤްސަދަކީ ކްރިއޭޓިވް އިކޮނޮމީގެ ދައުރު އިތުރަށް ފުޅާކޮށް، އެ ދާއިރާގައި އިތުރަށް ހަރަކާތްތެރިވުމުގެ ފުރުސަތު ދިވެހި ޒުވާނުންނަށް ފަހިކޮށްދިނުން."--- ރައީސް ޑރ. މުއިއްޒު ވިދާޅުވި އެވެ.

މި ލޯނަށް އެދި ހުށަހެޅުމުގެ ފުރުސަތު އެސްޑީއެފްސީން މިހާރު ވަނީ ހުޅުވާލައިފަ އެވެ. މި ލޯނަށް އެދި ހުށަހަޅާނީ އެސްޑީއެފްސީގެ ވެބްސައިޓް www.sdfc.mv ގައި ހިމެނޭ އެސްއެމްއީ ޕޯޓަލް މެދުވެރިކޮށެވެ.