އިންޑިޔާގެ ހުޅަނގު ގުޖްރާތު ސްޓޭޓްގެ އަޙްމަދްއާބާދް ކައިރިއަށް އެއަރ އިންޑިޔާގެ ބޮއިންގ މަތިންދާބޯޓެއް ވެއްޓުނު ހާދިސާއާއި ގުޅިގެން، އެ ޤައުމުގައި ބޭނުންކުރާ ބޮއިންގ-787 މަރުކާގެ ހުރިހާ ބޯޓުތަކެއް ތަޙުޤީޤުކޮށް، އެއްވެސް މައްސަލައެއް ހުރިތޯ ބަލައި، ދެނެގަތުމުގެ މަސައްކަތް ކުރަމުންދާ ކަމަށް، އިންޑިޔާގެ ވައިގެ ދަތުރުފަތުރާބެހޭ ވަޒީރު ރާމް މޯހަން ނައިޑޫ ވިދާޅުވެއްޖެއެވެ.
މިދިޔަ ބުރާސްފަތި ދުވަހުގެ މެންދުރުގެ ވަގުތެއްގައި، 242 މީހުންނާ އެކު އަޙްމަދްއާބާދުން ފުރައިގެން އިނގިރޭސިވިލާތުގެ ވެރިރަށް ލަންޑަނަށް ދަތުރު ކުރަމުން ދިޔަ އެއަރ އިންޑިޔާގެ މަތިންދާބޯޓު ވެއްޓުނީ އަޙްމަދްއާބާދް ވައިގެ ބަނދަރު ކައިރީގައި އޮންނަ މޭގާނީނަގަރް ކިޔާ ސަރަޙައްދަކަށެވެ. މި ހާދިސާގައި މިހާތަނަށް 270 މީހުން މަރުވެފައިވާކަމަށް އިންޑިޔާގެ ކަމާބެހޭ އިދާރާތަކުން ވަނީ ބުނެފައެވެ.
މިހާރު ކުރިޔަށްދާ ތަޙްޤީޤުގެ ތެރެއިން އިންޑިޔާގެ ވައިގެ ދަތުރުފަތުރާބެހޭ އިދާރާއިން އިއްޔެ ވަނީ، ޖެންއެކްސް އިންޖީނު އަޅާފައިވާ ބޮއިންގ 787-8/9 މަރުކާގެ މަތިންދާބޯޓުތަކުގެ އުދުއްސުމާއި އިންޖީނުގެ އިތުރު މެއިންޓެނަންސް ޗެކްތަކެއް ހެދުމަށް އެއަރ އިންޑިޔާއަށް އަންގާފައެގާފައެވެ. އިންޑިޔާގެ ފްލީޓުގައި 34 ބޮއިންގ-787 މަތިންދާބޯޓު ހިމެނެއެވެ.
Advertisement
ފުލައިޓް ވެއްޓުނު ޙާދިސާ ހިނގަން މެދުވެރިވި ސީދާ ސަބަބު ދެނެގަތުމަށް އެއަރ އިންޑިޔާ އާއި ގުޅިގެން އިންޑިޔާ ސަރުކާރުން މަސައްކަތް ކުރަމުންދާއިރު، އިންޖީނާއި، ފިޔަގަނޑާއި އަދި ބޯޓު ނައްޓައިލިފަހުން ވެސް ލޭންޑިން ގިޔަރު ތިރިވެފައި އިން މައްސަލަ ވެސް ދަނީ ބަލަމުންނެވެ.
މަތިންދާބޯޓުން ދަތުރުކުރި މީހުންގެ ތެރޭގައި 11 ކުޑަކުދިންނާއި 12 ފަޅުވެރިން ހިމެނޭއިރު، އިންޑިޔާގެ 169 މީހުންނާއި އިނގިރޭސިވިލާތުގެ 53 މީހުންނާއި ޕޯޗުގަލލްގެ ހަތް މީހުންނާއި ކެނެޑާއަށް ނިސްބަތްވާ މީހެއް ހިމެނޭކަމަށް އެއަރ އިންޑިޔާއިން ބުނެފައިވެއެވެ. މި ހާދިސާގައި ސަލާމަތްވީ އެންމެ މީހެކެވެ.
