މާލޭގައި ހުންނަ ފިހާރައަކަށް ވަދެ، ވަޅިން ބިރުދައްކައި ފައިސާ ފޭރުނު މީހާއަށް ދައުވާކުރަން ފުލުހުން ޕްރޮސިކިއުޓަރ ޖެނަރަލްގެ އޮފީހަށް މިއަދު ފޮނުވައިފިއެވެ.

ފުލުހުން މިއަދު ބުނީ މިދިޔަ މެއި މަހުގެ އެއް ވަނަ ދުވަހުގެ މެންދުރު ފަހު މައްޗަންގޯޅި ސަހަރާ ކައިރީގައި ހުންނަ "ޕަރާއޯ" ފިހާރައަށް ވަދެ، ވަޅިން ބިރުދައްކައި އެ ފިހާރައިގެ ވަތްގަނޑުގައި ހުރި ފައިސާ ފޭރުނު މައްސަލައިގެ ތަހުގީގު ނިންމައި ދައުވާކޮށްދިނުމަށް ޕީޖީ އޮފީހަށް މިހާރު ފޮނުވާފައިވާ ކަމަށެވެ.

އެ މައްސަލައިގައި ދައުވާކުރުމަށް ފޮނުވާފައި ވަނީ މާލެ، ހ. ރެދަން، ފަވާޒު ކަޅުތުއްތު، 36 ގެ މައްޗަށެވެ.

ފުލުހުން ބުނީ އެ މައްސަލައާ ގުޅިގެން ފަވާޒް ކަޅުތުއްތު ހައްޔަރުކޮށްފައި ވަނީ ކޯޓު އަމުރެއްގެ ދަށުން މިދިޔަ މެއި މަހުގެ 13 ވަނަ ދުވަހު ކަމަށެވެ. އަދި އޭނާގެ ބަންދާ މެދުގައި ގޮތެއް ނިންމުމަށް ކޯޓަށް ހާޒިރުކުރުމުން ޝަރީއަތުން ގޮތެއް ނިމެންދެން ބަންދުގައި ބެހެއްޓުމަށް އަމުރުކޮށްފައިވާ ކަމަށް ވެސް ފުލުހުން ބުންޏެވެ.

ފަވާޒް ކަޅުތުއްތުއަކީ މީގެ ކުރިން ތަފާތު އެކި މައްސަލަތަކުގައި 52 ފަހަރަކު ހައްޔަރުކޮށްފައިވާ މީހެއް ކަމަށް ވެސް ފުލުހުން ބުންޏެވެ.