ޤަވާޢީދާއި ޚިލާފަށް ސިނގިރޭޓު ކާޓަންތަކެއް އެތެރެކުރިކަމުގެ ތުހުމަތުގައި ހައްޔަރުކުރި ބިދޭސީ މީހާ އަތުން ފެނުނު އެ ސިނގިރޭޓު ކާޓަންތަކަކީ މީހަކު ހަވާލުކުރި އެއްޗެއް ކަމަށް ބުނެފިއެވެ.

އެ މައްސަލައިގައި މިދިޔަ މެއި މަހުގެ 24 ވަނަ ދުވަހު ހައްޔަރުކޮށްފައިވަނީ ބަންގްލަދޭޝް އަށް ނިސްބަތްވާ އަބްދުލް ކަރީމް (45އ) އެވެ. އޭރު އޭނާ ހައްޔަރުކުރުމަށް ފަހު ކްރިމިނަލް ކޯޓަށް ހާޒިރު ކުރުމުން 15 ދުވަހަށް ބަންދު ކުރުމަށް ވަނީ އަމުރުކޮށްފައެވެ. އެ މުއްދަތު ހަމަވިއިރު ކްރިމިނަލް ކޯޓުން އިއްޔެ ވަނީ އަނެއްކާވެސް 15 ދުވަހަށް އޭނާ ބަންދު ކުރުމަށް އަމުރުކޮށްފައެވެ.

ކްރިމިނަލް ކޯޓުން ބުނީ، އެ ސިނގިރޭޓު ކާޓަންތަކަކީ އޭނާގެ ރައްޓެއްސަކު ގުޅާފައި ހަވާލުކުރި އެއްޗެއް ކަމަށް ކޯޓުގައި އިއްޔެ އޭނާ ބުނެފައިވާ ކަމަށެވެ. ނަމަވެސް ސިނގިރޭޓުތައް ހަވާލުކުރި މީހާއާ ގުޅޭ އެއްވެސް މަޢުލޫމާތެއް ބުނެދެވިފައި ނުވާކަމަށް ކޯޓު އަމުރުގައި ބުނެފައިވެއެވެ.

މި މައްސަލައިގައި ފުލުހުން ކުރިން ބުނީ މިދިޔަ މަހުގެ 23 ވަނަ ދުވަހުގެ ރޭ 12:15 އެހައިކަންހާއިރު ވިލިމާލެ ފުލުހުން ހިންގި އޮޕަރޭޝަނެއްގައި ތިލަފުށި ބޯޓުޔާޑުގައި އޮތް ދޯންޏެއް ބަލައި ފާސްކުރިއިރު ޤަވާޢިދާ ޚިލާފަށް ރާއްޖެ އެތެރެކޮށްފައިވާ ކަމަށް ތުހުމަތުކުރެވޭ، މެންޗެސްޓާ ބްރޭންޑުގެ 32 ކާޓަން ސިނގިރޭޓް ފެނިފައިވާ ކަމަށެވެ.

މި މައްސަލައިގައި ހައްޔަރުކުރި ކަރީމް އަކީ ޤަވާޢިދާއި ޚިލާފަށް ރާއްޖޭގައި އުޅޭ މީހެއްކަންވެސް ތަޙުޤީޤަށް އެނގިފައިވާކަމަށް ފުލުހުން ބުނެފައިވެއެވެ.