ފުލުހުންގެ ސައިބަރ ކްރައިމް ސެންޓަރަށް ސެކިއުރިޓީ އެނަލިސްޓުން ހޯދަން އިޢުލާނުކޮށްފިއެވެ.
ފުލުހުން އިޢުލާނުކޮށްފައިވަނީ ޓެކްނިކަލް ސަޕޯޓް އޮފިސަރު (ސެކިއުރިޓީ އެނަލިސްޓް) މަޤާމަށް 4 މީހަކު ހޯދުމަށެވެ.
މި މަޤާމަށް ކުރިމަތިލާ ފަރާތަކީ ވަޒީފާގެ މަސްއޫލިއްޔަތު އަދާކުރެވޭ ފަދަ ސިއްހަތެއްގައި ހުރި މީހެއް ކަމުގައިވުމާއެކު، މީލާދީ ގޮތުން 18 އަހަރާއި 40 އަހަރާ ދެމެދުގެ ފަރާތެއް ކަމުގައިވާން ޖެހޭނެއެވެ.
އިތުރު ޝަރުތުތަކުގެ ތެރޭގައި:
- ކޮމްޕިއުޓަރ ސައިންސް، އިންފޮމޭޝަން ސެކިއުރިޓީ ނުވަތަ ގުޅުންހުރި ދާއިރާއިން މޯލްޑިވްސް ކޮލިފިކޭޝަން އޮތޯރިޓީން ގަބޫލުކުރާ ލެވެލް 07 ނުވަތަ 08ގެ ސަނަދެއް ހާސިލްކޮށްފައިވުން. ނުވަތަ،
- ކޮމްޕިއުޓަރ ސައިންސް، އިންފޮމޭޝަން ސެކިއުރިޓީ ނުވަތަ ގުޅުންހުރި ދާއިރާއިން މޯލްޑިވްސް ކޮލިފިކޭޝަން އޮތޯރިޓީން ގަބޫލުކުރާ ލެވެލް 05 ނުވަތަ 06ގެ ސަނަދެއް ހާޞިލްކޮށްފައިވުމާއިއެކު މަސައްކަތާއި ގުޅުންހުރި ދާއިރާއަކުން މަދުވެގެން 02 އަހަރުދުވަހުގެ ތަޖުރިބާ ލިބިފައިވުން.
- އިސްލާމް ދީނުގައި ހައްދެއް ކަނޑައެޅިފައިވާ ކުށެއް ނުވަތަ ވައްކަން، ޓެކުން، މަކަރާ ހީލަތް، މަސްތުވާތަކެތި ބޭނުންކުރުން، ނުވަތަ މަސްތުވާތަކެތީގެ ވިޔަފާރިކުރުން، އަދި ހިޔާނާތް ފަދަ ކުށެއް ކުރިކަން ވޭތުވެދިޔަ 05 އަހަރުދުވަހުގެ ތެރޭގައި ޝަރީއަތަށް ސާބިތުވެފައިވާ ފަރާތެއް ކަމުގައި ނުވުން.
- ވޭތުވެދިޔަ 05 އަހަރު ދުވަހުގެ ތެރޭގައި، މަނާކުރެވިފައިވާ މަސްތުވާއެއްޗަކުން އެކަހެރިވުމަށް ފަރުވާ ހޯދާފައިވާ ފަރާތަކަށް ނުވުން.
މި މަޤާމަށް ކުރިމަތިލާ ފަރާތްތަކަށް މަހު މުސާރައިގެ ގޮތުގައި ޖުމުލަ 22،000 އެއްހާ ރުފިޔާ ލިބޭނެއެވެ.
މުސާރައިގެ ތަފްސީލު:
- އަސާސީ މުސާރަ: -/7،000 ރުފިޔާ
- ސަރވިސް އެލަވަންސްގެ ގޮތުގައި މަހަކު: -/2،700 ރުފިޔާ
- ނޮން-ޕްރެކްޓިސް އެލަވަންސް: -/2،450 ރުފިޔާ (އަސާސީ މުސާރައިގެ %35)
- އިތުރު ގަޑީގެ ގޮތުގައި މަހަކު: -/4،200 ރުފިޔާ (އަސާސީ މުސާރައިގެ %60)
- ހަމަޖެހިފައިވާ އުސޫލުގެ ތެރެއިން ޕްރޮފެޝަނަލް އެލަވަންސް -/1،050 ރުފިޔާ (އަސާސީ މުސާރައިގެ 15 އިންސައްތަ)
- ފުޑް އެލަވަންސް ދުވާލަކަށް -/160 ރުފިޔާ
- ބޭސްފަރުވާ ކުރުން
މި މަގާމަށް އެދި ފޯމް ހުށަހަޅާ ފަރާތަކީ ދިވެހި ރާއްޖޭގައި ރަޖިސްޓްރީ ކޮށްފައިވާ އެއްވެސް ސިޔާސީ ޕާޓީއެއްގެ ރަޖިސްޓްރީގައިވާ ފަރާތެއް ކަމުގައި ނުވުމަށް އިޢުލާނުގައި ބުނެފައިވެއެވެ. މި ވަޒީފާއަށް ކުރިމަތިލާ ފަރާތްތަކަށް ދެވޭ މެޑިކަލް އެގްޒަމިނޭޝަން، ޕޮލިގްރަފީ ޓެސްޓް، ކުރެވޭ އިންޓަވިއު އަދި ބެކްގްރައުންޑް އެސެސްމަންޓުން ފާސްވާން ޖެހޭނެ ކަމަށް އިއުލާނުގައި ބުނެފައިވެއެވެ.
މީގެ އިތުރުން މަގާމަށް ކުރިމަތިލާ ފަރާތަކީ އިސްލާމް ދީނުގައި ޙައްދެއް ކަނޑައެޅިފައިވާ ކުށެއް ނުވަތަ ވައްކަން، ޓެކުން، މަކަރާ ޙީލަތް، މަސްތުވާތެކެތި ބޭނުންކުރުން، ނުވަތަ މަސްތުވާތަކެތީގެ ވިޔަފާރިކުރުން، އަދި ހިޔާނާތް ފަދަ ކުށެއް ކުރިކަން ވޭތުވެދިޔަ 05 އަހަރުދުވަހުގެ ތެރޭގައި ޝަރީޢަތަށް ސާބިތުވެފައިވާ ފަރާތެއް ކަމުގައި ނުވުން ހިމެނެއެވެ. އަދި ވޭތުވެދިޔަ 05 އަހަރު ދުވަހުގެ ތެރޭގައި، މަނާކުރެވިފައިވާ މަސްތުވާއެއްޗަކުން އެކަހެރިވުމަށް ފަރުވާ ހޯދާފައިވާ ފަރާތަކަށް ނުވުމަކީވެސް މި މަޤާމަށް ހޮވުމުގެ ޝަރުތެއް ކަމަށްވެސް އިޢުލާނުގައި ބުނެފައިވެއެވެ.
މި މަޤާމަށް އެދި ހުށަހަޅާ ފަރާތްތަކުން ދިވެހި ފުލުހުންގެ ޚިދުމަތުގެ ވަޒީފާއަށް އެދި ހުށަހަޅާ ފޯމާއި ކުށުގެ ރެކޯޑް ބަލާ ފޯމް ފުރިހަމަކުރުމަށްފަހު ހުށަހަޅަންޖެހޭ ލިޔުންތަކާއެކު މި މަހުގެ 16 ވަނަ ދުވަހުގެ 16:00 ގެ ކުރިން ޝަހީދު ހުސައިން އާދަމް ބިލްޑިންގގެ ރިސެޕްޝަނަށް ހުށަހެޅުމަށް ފުލުހުން ވަނީ އެދިފައެވެ.
ފުލުހުން ބުނީ މި މަޤާމުތަކަށް އެދި ފޯމު ހުށަހަޅާ ފަރާތްތަކުގެ ތެރެއިން މަޤާމުގެ ޝަރުތު ހަމަނުވާ ފަރާތްތަކުގެ ފޯމު ބާތިލުވާނެ ކަމަށެވެ. އަދި އިންޓަވިއުއަށް ކިޔާނީ ވަޒީފާއަށް އެދި ފޯމު ހުށަހަޅާ ފަރާތްތަކުގެ ތެރެއިން ޝޯޓްލިސްޓްކުރެވޭ ފަރާތްތަކަށް އެކަނި ކަމަށް ފުލުހުން ބުނެފައިވެއެވެ.
