މިއަދު މިނާ ގަނޑުވަރުގައި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ސަޢުދީ އަރަބިއްޔާގެ ވަލީ އަހުދު އަދި ބޮޑުވަޒީރު އަމީރު މުޙައްމަދު ބިން ސަލްމާން ބިން ޢަބްދުލްޢަޒީޒް އާލް ސަޢޫދާއި ބައްދަލުކުރައްވައިފިއެވެ. މި ބައްދަލުކުރެއްވުމުގައި ދެޤައުމުގެ އިސްވެރިން ޢީދުލްއަޟްޙާގެ ހެޔޮ އެދުންތައް ބަދަލުކުރެއްވިއެވެ.
ސަޢުދީ ޕްރެސް އެޖެންސީން ނެރުނު ނޫސް ބަޔާނެއްގައި ބުނެފައިވާ ގޮތުގައި، މި ބައްދަލުކުރެއްވުމުގައި ދެ ޤައުމުގެ ދެމެދުގައިވާ ގުޅުންތަކާއި، އިތުރަށް އެއްބާރުލުން ކުރިއެރުވުމުގެ ފުރުޞަތުތަކާ ބެހޭގޮތުން ދެ ބޭފުޅުން މަޝްވަރާކުރެއްވިއެވެ. މީގެ އިތުރުން، ދެ ޤައުމުގެ މަޞްލަޙަތު ހިމެނޭ އެހެނިހެން މުހިންމު ކަންކަމާއި ގުޅޭގޮތުންވެސް މަޝްވަރާކުރެއްވިކަމަށް އެ ބަޔާނުގައި ފާހަގަކޮށްފައިވެއެވެ.
ދިވެހިރާއްޖެއާއި ސަޢުދީ އަރަބިއްޔާއަކީ އިސްލާމީ އުޚުއްވަތްތެރިކަމުގެ ގުޅުން އޮންނަ ދެ ޤައުމެވެ.
