އަފްޣާނިސްތާނަށް އައި ބާރުގަދަ ބިންހެލުމާއި ގުޅިގެން ޠާލިބާން ސަރުކާރުން އެހީ އަށް އެދުމުން ޤައުމުތަކުން އެހީ ފޮނުވަން ފަށައިފިއެވެ. މިހާތަނަށް އެންމެ ގިނައިން ފައިސާ ދިނީ އިނގިރޭސީވިލާތުން ކަމަށް އަފްޣާނިސްތާުން ބުނެއެވެ. އެއީ 1.3 މިލިއަން އެމެރިކާ ޑޮލަރެވެ.

މި ބިންހެލުމުގައި މިހާތަނަށް 1،400 އަށް ވުރެ ގިނަ މީހުން މަރުވެ 3،000 އަށް ވުރެ ގިނަ މީހުން ޒަހަމްވެފައިވާއިރު، އިތުރު އެތައް ހާސް ބަޔަކު ވަނީ ގެއްލިފައެވެ. އެ ޤައުމުގެ މަސްދަރުތަކުން ބުނާ ގޮތުގައި 8،000 އެއްހާ ގެދޮރު މުޅިން ހަލާކުވެފައިވާއިރު، ބިންހެލުން އައި ސަރަޙައްދުގެ މީހުން ބިރަށް ނިދަނީ ވެސް މަގުމަތީގައާއި ޕާކުތަކުގައެވެ.

^{ޙާލުގައި ޖެހިފައިވާ އަފްޣާނިސްތާނުގެ ކުދިންތަކެއް މަގުމަތީގައި ނިދާފައި: ބިންހެލުމުގައި ޙާލުގައި ޖެހުނު މީހުންގެ ޢަދަދު 1.3 މިލިއަން މީހުން ަށް އަސަރުކުރި. (ފައިލް ފޮޓޯ)}

މި ބިންހެލުމާއި ގުޅިގެން ސަލާމަތްވީ މީހުންނަށް އެހީވުމަށް ސައުދީ އަރަބިއްޔާއިން އެއްވެސް ފައިސާއެއް ހަދިޔާ ކުރިކަން މިހާތަނަށް ޢާންމުކޮށް އިޢުލާންކޮށްފައެއް ނުވެ އެވެ. ނަމަވެސް ކިންގް ސަލްމާން ހިއުމަނިޓޭރިއަން އެއިޑް އެންޑް ރިލީފް ސެންޓަރު (ކޭއެސްރިލީފް) މެދުވެރިކޮށް 1،000 ފުޑް ބާސްކެޓާއި އިންސާނީ އެހީތެރިކަން ފޯރުކޮށްދީފައިވެ އެވެ. ސައުދީން ވަނީ މަރުވި މީހުންގެ ޢާއިލާތަކަށް ތަޢުޒިޔާ ކިޔާފައެވެ.

^{އަފްޣާނިސްތާނަށް އައި ބިންހެލުމުގައި މަރުވެފައިވާ ބައެއް ކުދިންގެ ހަށިތައް ގެންދަނީ؛ މި ބިންހެލުމުގައި މަރުވި މީހުންގެ ޢަދަދު ވަނީ 1400 އަށް އަރާފައި. / ފޮޓޯ: ގެޓީ}

އަފްޣާނިސްތާނުގެ މީޑިއާތަކުން ބުނާ ގޮތުގައި ޔޫރަޕިއަން ޔޫނިއަނުން ވަނީ 1 މިލިއަން ޔޫރޯ (1.2 މިލިއަން އެމެރިކާ ޑޮލަރު) އާއި 130 ޓަނުގެ ކުއްލި ސާމާނު ފޮނުވާފައެވެ. މީގެ އިތުރުން ޖުމްލަ 185 މިލިއަން ޑޮލރުގެ އެހީގެ ސާމާނު އީޔޫއިން ވަނީ ދޭން ނިންމާފައެވެ. އަވަށްޓެރި އިންޑިއާއިން 1000 ޓެންޓާއި 15 ޓަނުގެ ކާބޯތަކެތި ފޮނުވާފައިވާއިރު، ޔޫއޭއީން ވަނީ ގެއްލިފައިވާ މީހުން ހޯދުމަށް ޓީމުތަކާއި ޓެންޓްތަކާއި ޞިއްޙީ ސާމާނު ފޮނުވާލާފައެވެ. އީރާނު ސަރުކާރުން ވެސް 80 ޓަނުގެ ފުށާއި ތެޔޮ ފޮނުވާފައިވާއިރު، ޗައިނާއިން ވަނީ މި ކާރިސާގައި އަފްޣާނިސްތާނަށް އެހީތެރިކަން ފޯރުކޮށްދިނުމަށް ތައްޔާރަށް ހުރިކަން ހާމަކޮށްފައެވެ.