ކުރިުަށް އޮތް ފީފާ ވޯލްޑް ކަޕްގައި ކުޅުމަށް މިއަދު ދެކުނު އެމެރިކާގެ ސަރަޙައްދީ ކޮލިފައިންގައި އާޖެންޓީނާއިން ޗިލީ ބަލިކޮށްލައިފިއެވެ. މި މެޗުގައި އާޖެންޓީނާގެ ކެޕްޓަން ލިއޮނެލް މެސީ ނުކުޅުނު ނަމަވެސް، މެންޗެސްޓަރ ސިޓީގެ ފޯވާޑް ޖޫލިއާން އަލްވާރެޒް ވަނީ ފޯމު ދައްކާލައި މެޗުގައި ފެނުނު ހަމައެކަނި ގޯލް ޖަހާފައެވެ.

އަލްވާރޭޒް ގޯލު ޖެހީ މެޗުގެ 16 ވަނަ މިނެޓުގައި ތިއާގޯ އަލްމާދާގެ ޕާހަކުންނެވެ.

މެސީ އާއި އެހެން މުހިންމު ބައެއް ކުޅުންތެރިން މި މެޗުގައި ނުކުޅުނު ނަމަވެސް، ކޯޗް ލިއޮނެލް ސްކަލޯނީ ވަނީ ޒުވާން ކުޅުންތެރިންނަށް ފުރުސަތު ދީފައެވެ. މީގެ ތެރޭގައި 17 އަހަރުގެ ފްރާންކޯ މަސްޓަންޓުއޯނޯ ވަނީ އާޖެންޓީނާގެ ސީނިއަރ ޓީމުގައި ކުޅުނު އެންމެ ހަގު ފިރިހެން ކުޅުންތެރިޔާގެ ރެކޯޑު ޤާއިމްކޮށްފައެވެ.

މެޗުގެ ފަހު ވަގުތުތަކުގައި ޗިލީން ކުޅުން ރަނގަޅުކުރި ނަމަވެސް، އާޖެންޓީނާގެ ޑިފެންސުން ވަނީ ވަރަށް ރަނގަޅަށް މަސައްކަތްކޮށްފައެވެ. މި ނަތީޖާއާއެކު އާޖެންޓީނާ ވަނީ ކޮންމެބޯލް ކޮލިފައިންގ މެޗުތަކުގައި ބަލިނުވެ ރެކޯޑު ދަމަހައްޓާފައެވެ. އަދި މިހާރުވެސް އާޖެންޓީނާ އޮތީ ޕޮއިންޓް ތާވަލުގެ އެންމެ ކުރީގައެވެ.

އާޖެންޓީނާގެ ދެން އޮތް މެޗަކީ މިމަހުގެ 10 ގައި ބުއެނޯސް އައިރެސްގައި ކޮލަމްބިއާއާ ދެކޮޅަށް ކުޅޭ މެޗެވެ. މި މެޗުގައި މެސީ ކުޅޭނެކަން އަދި ކަށަވަރެއް ނޫނެވެ.