ފީފާ ވޯލްޑް ކަޕް 2026 ގެ ސެމީ ފައިނަލްގައި އާޖެންޓީނާ އާއި އިންގްލެންޑް ބައްދަލުކުރި ފޯރިގަދަ މެޗަށްފަހު، އާޖެންޓީނާގެ ސަޕޯޓަރުން އިނގިރޭސިވިލާތުގެ ގައުމީ ދިދައަށް ކުޅުޖަހައި، ފައިން އަރައި އަދި ދިދަ އަންދައި އިހާނެތިކޮށް ހިތާ މަންޒަރު ފެންނަ ވީޑިއޯތަކެއް ދުނިޔޭގެ ސޯޝަލް މީޑިއާގައި ވަރަށް ބޮޑަށް ވައިރަލް ވެއްޖެއެވެ.
ބައިނަލްއަގުވާމީ ބޮޑެތި މީޑިއާތަކުން ރިޕޯޓްކޮށްފައިވާ ގޮތުގައި، މި ހާދިސާތައް ހިނގާފައިވަނީ އެމެރިކާގެ ނިއުޔޯކްގެ ޓައިމްސް ސްކްވެއަރގެ އިތުރުން އާޖެންޓީނާގެ ބައެއް ސިޓީތަކުގައެވެ. މި މެޗުން އާޖެންޓީނާ 2-1 އިން މޮޅުވުމާ އެކު، ނިއުޔޯކްގައި އުފާފާޅުކުރަމުންދިޔަ އާޖެންޓީނާގެ ގިނަ އަދަދެއްގެ ސަޕޯޓަރުން ވަނީ އިނގިރޭސި ދިދައެއް ބިމަށް އެއްލާލައި، އޭގެއަށް ކުޅުޖަހައި އަދި ބޫޓުން ފައިން އަރައި ފުރައްސާރަ ކޮށްފައެވެ. މީގެ އިތުރުން މެޗުގެ ކުރިން އާޖެންޓީނާގެ އެސްކޯބާރ ސިޓީގައި ބޭއްވި އެއްވުމެއްގައި ސަޕޯޓަރުން ވަނީ އިނގިރޭސިވިލާތަށް ނިސްބަތްވާ ދިދައެއްގައި ރޯކޮށް އަންދާލާފައެވެ.
މީގެ ފަހަތުގައި 1982 ވަނަ އަހަރު ފޯކްލޭންޑް ޖަޒީރާގެ މިލްކުވެރިކަމާ މެދު އިނގިރޭސިވިލާތާއި އާޖެންޓީނާއާ ދެމެދު ހިނގި ހަނގުރާމައިގެ ސިޔާސީ ނުތަނަވަސްކަން ވަރަށް ބޮޑަށް އެކުލެވިގެންވެއެވެ.
Advertisement
މި މެޗު ފެށުމުގެ ކުރިން ދެ ގައުމުގެ ގައުމީ ސަލާމް ކުޅުނު ވަގުތުވެސް ސަޕޯޓަރުންގެ ފަރާތުން ބޮޑެތި ހުރަސްތަކަކާއި އަޑުގަދަކުރުންތަކެއް ވަނީ ފެނިގެން ގޮސްފައެވެ. ދިދައަށް އިހާނެތިކޮށް ހިތުމުގެ މައްސަލައިގައި ގިނަ ބައެއްގެ ފާޑުކިޔުންތައް އާޖެންޓީނާގެ ސަޕޯޓަރުންނަށް އަމާޒުވަމުންދާއިރު، މެޗުގެ ތެރޭގައި އާޖެންޓީނާގެ ކުޅުންތެރިން ފޯކްލޭންޑާ ބެހޭ ސިޔާސީ ބެނާއެއް ދެއްކި މައްސަލަވެސް މިހާރު ވަނީ ވަރަށް ހޫނުވެފައެވެ.
ފީފާގެ ގަވާއިދުތަކާ ޚިލާފަށް ދަނޑުމަތީގައި ސިޔާސީ މެސެޖުތައް ބޭނުންކުރުމާއި، ސަޕޯޓަރުންގެ އަޚުލާގީ މައްސަލަތަކާ ގުޅިގެން ފީފާއިން އާޖެންޓީނާގެ ފުޓްބޯޅަ އެސޯސިއޭޝަނާ މެދު ހަރުކަށި ފިޔަވަޅުތަކެއް އަޅާފާނެ ކަމުގެ ބިރު ވެސް އެބައޮތެވެ.
