ދިވެހިރާއްޖޭގެ ޤައުމީ ފުޓްބޯޅަ ޓީމު މާދަމާ ސިންގަޕޫރާއި ދެކޮޅަށް ކުޅޭ އެކުވެރިކަމުގެ މެޗުގައި މައިގަނޑު އަމާޒަކަށް ވާނީ ޓިމޯ-ލެސްޓޭ އާއި ދެކޮޅަށް ކުޅޭ މުހިންމު މެޗަށް ތައްޔާރުވުން ކަމަށް ދިވެހިރާއްޖޭގެ ޤައުމީ ފުޓްބޯޅަ ޓީމުގެ ހެޑް ކޯޗު އަލީ ސުޒެއިން ވިދާޅުވެއްޖެއެވެ.
ސިންގަޕޫރަށް ފުރުމުގެ ކުރިން ދައުލަތުގެ މީޑިއާ އަށް ދެއްވި ޚާއްޞަ އިންޓަވިއުއެއްގައި ސުޒެއިން ވިދާޅުވީ، ސިންގަޕޫރު މެޗުގެ ނަތީޖާއަކީވެސް މުހިންމު ނަތީޖާއެކެވެ. ނަމަވެސް، އެ މެޗު ބޭނުންކުރާނީ ޓިމޯ ލެސްޓޭއާ ދެކޮޅަށް ކުޅޭ ވާދަވެރި މެޗަށް ވީހާވެސް ބޮޑަށް ތައްޔާރުވުމަށް ކަމަށެވެ.
ސުޒެއިން ވިދާޅުވީ ޤައުމީ ޓީމުގެ ތައްޔާރީތަކާއި ދޭތެރޭ ވަރަށް ހިތްހަމަޖެހޭ ކަމަށެވެ. ޕްރެކްޓިސްތަކުންވެސް އެކަން ވަރަށް ރަނގަޅަށް ފެނިގެން ދިޔަ ކަމަށާއި ފިޓްނަސް ވެސް ވަރަށް ރަނގަޅު ކަމަށް ސުޒެއިން ވިދާޅުވިއެވެ.
Advertisement
ޤައުމީ ޓީމު ސިންގަޕޫރަށް ދިޔައީ މާދަމ ކުޅޭ އެކުވެރިކަމުގެ މެޗަށެވެ. ސިންގަޕޫރުގެ ދަޢުވަތަކަށް ކުޅޭ މި މެޗު އޮންނާނީ ސިންގަޕޫރު ނޭޝަނަލް ސްޓޭޑިއަމްގައެވެ. ސިންގަޕޫރުގައި ކޭމްޕް ކުރުމަށްފަހު ޤައުމީ ޓީމު ފުރާނީ އޮސްޓްރޭލިއާ އަށެވެ.
އޭއެފްސީ އޭޝިއަން ކަޕް ކޮލިފައިންގައި ރާއްޖެއިން ޓިމޯ ލެސްޓޭއާ ދެކޮޅަށް ކުޅޭ އަވޭ މެޗު ކުޅުމަށް ހަމަޖެހިފައިވަނީ މިމަހުގެ 10 ވަނަ ދުވަހު އޮސްޓްރޭލިއާގެ ޑާވިންގައެވެ. މިއީ ޤައުމީ ޓީމުން އޮސްޓްރޭލިއާގައި ކުޅޭ ފުރަތަމަ މެޗެވެ.
2027 ވަނަ އަހަރު ސަޢޫދީ ޢަރަބިއްޔާގައި އޮންނަ އޭއެފްސީ އޭޝިއަން ކަޕް ކޮލިފައިންގައި ޓިމޯ ލެސްޓޭއާ ދެކޮޅަށް ރާއްޖެއިން ކުޅޭ މެޗު އޮސްޓްރޭލިއާގެ ޑާވިންގައި އޮންނަ ޓެރިޓަރީ ރަގްބީ ލީގު ސްޓޭޑިއަމަށް ބަދަލުކޮށްފައިވަނީ ޓިމޯ ލެސްޓޭގައި ބައިނަލްއަޤްވާމީ ފެންވަރުގެ ދަނޑެއް ނެތުމުގެ ސަބަބުންނެވެ.
