ފީފާ 15 އަހަރުން ދަށުގެ ވޯލްޑް ކަޕް އެންޑް ފެސްޓިވަލް ގައި ވާދަކުރުމުގެ ތާރީޚީ ފުރުސަތު ދިވެހިރާއްޖޭގެ 15 އަހަރުން ދަށުގެ ގައުމީ ފުޓްބޯޅަ ޓީމަށް ލިބިއްޖެއެވެ. މި އަހަރުގެ އޮކްޓޯބަރު 22 އިން 31 އަށް ކުރިއަށްގެންދަން ނިންމާފައިވާ މި މުބާރާތް ބޭއްވުމުގެ ފުރުސަތު ފީފާ އިން ދީފައިވަނީ ދުނިޔޭގެ ފެންވަރުގެ ކުޅިވަރުގެ ވަސީލަތްތައް ގާއިމްވެފައިވާ އަޒަރުބައިޖާންގައެވެ.

މިއީ ފީފާގެ ތާރީޚުގައި ވެސް 15 އަހަރުން ދަށުގެ އުމުރުފުރާއަށް އަމާޒުކޮށްގެން މުޅިން އަލަށް ބާއްވާ ވޯލްޑް ކަޕް މުބާރާތެވެ.

ފީފާ އިން މި މުބާރާތް އަލަށް ތައާރަފްކުރީ ދުނިޔޭގެ ހުރިހާ ގައުމުތަކެއްގެ ޒުވާން ހުނަރުތަކަށް ބައިނަލްއަގުވާމީ މައިދާނުން ފުރުސަތު ހޯދައިދީ، ފުޓްބޯޅަ ކުރިއެރުވުމުގެ މަގްސަދުގައެވެ.

މި ފަހަރުގެ ފުރަތަމަ މުބާރާތް ކުރިއަށްދާނީ 2011 އަދި 2012 ވަނަ އަހަރު އުފަންވި ފިރިހެން ކުދިންނަށް ޚާއްސަކޮށްގެން، ފެސްޓިވަލެއްގެ ސިފައިގައެވެ. މި މުބާރާތުގެ ޚަރަދުތައް ފީފާ އިން ފުރިހަމައަށް ފަންޑުކުރާއިރު، ކޮންމެ ގައުމަކުން ވެސް ބައިވެރި ކުރެވޭނީ 14 ކުޅުންތެރިންގެ ކޮމްޕެކްޓް ސްކޮޑެކެވެ. މުބާރާތް ފެށިގެންދާނީ 32 ގްރޫޕަކަށް ބަހާލައިގެން ކުޅެވޭ ބޮޑު ކޮލިފިކޭޝަން ބުރަކުންނެވެ.

މި މުބާރާތުގައި ފީފާގެ މެންބަރު ހުރިހާ ގައުމުތަކަށް ފުރުސަތު ހުޅުވާލާފައިވާއިރު، ދެކުނު އޭޝިއާ ސަރަހައްދުން މި ވަގުތު ވާދަނުކުރެވޭނީ ހަމައެކަނި ނޭޕާލަށެވެ. އެއީ ފީފާގެ ގަވާއިދުތަކާ ޚިލާފަށް ތިންވަނަ ފަރާތެއްގެ ނުފޫޒު ފޯރުވުމުގެ ސަބަބުން ނޭޕާލް ފުޓްބޯޅަ އެސޯސިއޭޝަން ސަސްޕެންޑްކޮށްފައި އޮތުމުންނެވެ.