ފޯރިގަދަ އަދި ވާދަވެރި ކުޅުމަކަށްފަހު، ޕެނަލްޓީ ޝޫޓްއައުޓްގައި 5-3 ގެ ނަތީޖާއަކުން ނިއުރޭޑިއަންޓް ސްޕޯޓްސް ކްލަބް ބަލިކޮށް، މާޒިޔާ ސްޕޯޓްސް އެންޑް ރެކްރިއޭޝަނުން ހަތްވަނަ ފަހަރަށް އެފްއޭއެމް ޗެރިޓީ ޝީލްޑް ކާމިޔާބުކޮށްފިއެވެ.
ގައުމީ ފުޓްބޯޅަ ދަނޑުގައި ކުޅުނު ދިވެހި ފުޓްބޯޅަ ސީޒަން ހުޅުވި މެޗުގެ ފުރިހަމަ ވަގުތު (90 މިނެޓު) ހަމަވިއިރު، ދެ ޓީމު ވަނީ 3-3 ގެ ނަތީޖާއަކުން އެއްވަރުވެފައެވެ.
މެޗުގެ 4 ވަނަ މިނިޓުގައި ނިއުގެ ބްރެޒިލް ފޯވާޑް ޑޮރިއެލްޓަން ވަނީ ފުރަތަމަ ލަނޑު ޖަހައި ލީޑު ނަގައިދީފައެވެ. މިއީ ލުއިސް ގޮމޭސް ޑަ ސިލްވާ ހުރަސްކޮށްދިން ބޯޅައެއް ބޮލުން އަރައި ގޯލުގެ މަތީ ކަނަށް ވައްދައިލައިގެން ބްރެޒިލްގެ ފޯވާޑް ޑޮރިއެލްޓަން ގޯމޭޒް ނަސިމެންޓޯ ކާމިޔާބުކޮށްދިން ގޯލެކެވެ.
Advertisement
މެޗުގެ 36 ވަނަ މިނިޓުގައި އީތަން އިބްރާހީމް ޒަކީގެ އެހީތެރިކަމާއެކު ނިއުގެ އަލީ ފާސިރު (ސެންޓޭ) ވަނީ ގޯލެއް ޖަހައި ލީޑު ފުޅާކޮށްފައެވެ. ނަމަވެސް ފުރަތަމަ ހާފު ނިމެން ދެ މިނެޓަށް ވެފައި ވަނިކޮށް (43 ވަނަ މިނިޓުގައި) އަހުމަދު އައިހަމް ދިން ބޯޅައަކުން މާޒިޔާގެ އީލަން ވަނީ ގޯލެއް ޖަހައި ފަރަގު ކުޑަކޮށްފައެވެ. އެކަމަކު ފުރަތަމަ ހާފުގެ އިތުރު ވަގުތުގައި ނިއުގެ ޑޮރިއެލްޓަން ވަނީ އޭނާގެ ދެވަނަ ގޯލާއެކު އަލުން ނިއުއަށް ލީޑު ފުޅާކޮށްދީފައެވެ.
ދެވަނަ ހާފުގައި މާޒިޔާއިން ކުޅުން ވަރުގަދަކޮށް، މެޗުގެ 51 ވަނަ މިނިޓުގައި އިބްރާހީމް މަހުދީ (ފޭދޫ އިއްބެ) ވަނީ މާޒިޔާގެ ދެވަނަ ލަނޑު ޖަހައިދީފައެވެ. އަދި އޭގެ ފަހުން 65 ވަނަ މިނިޓުގައި އަހުމަދު އައިހަމް ނަގައިދިން ހުރަހަކުން މާޒިޔާގެ އީލަން ވަނީ މެޗުގެ ދެވަނަ ގޯލު ޖަހައި ނަތީޖާ 3-3 އަށް ހަމަހަމަކޮށްދީފައެވެ.
ނިއުގެ ޑޮރިއެލްޓަން (2 ގޯލު) އަދި މާޒިޔާގެ އީލަން (2 ގޯލު) ގެ ފަރާތުން މޮޅު ކުޅުމެއް ފެނިގެން ދިޔަ މި މެޗުގެ 90 މިނެޓު ހަމަވިއިރު އެއްވަރުވެފައި އޮތުމުން ނަތީޖާ ނެރުނީ ޕެނަލްޓީ ޖަހައިގެންނެވެ. ޕެނަލްޓީ ޝޫޓްއައުޓްގައި މާޒިޔާގެ އީލަން، އައިހަމް، އައިސަމް، އައިދު މުހައްމަދު އަދި ހައިޝަމް ހަސަން ޕެނަލްޓީތައް ކާމިޔާބުކުރިއެވެ. ނިއުގެ ނާއިމް ޖެހި ޕެނަލްޓީ މާޒިޔާގެ ކީޕަރު ހުސެއިން ޝަރީފް ދިފާއުކުރުމުން މާޒިޔާއަށް 5-3 އިން މެޗު ކާމިޔާބުވިއެވެ.
މިއީ މާޒިޔާއިން މި މުބާރާތް ކާމިޔާބުކުރި ހަތްވަނަ ފަހަރަށް ވާއިރު، މީގެ ކުރިން އެ ޓީމުން ވަނީ 2015، 2016، 2017، 2021، 2023 އަދި 2025 ވަނަ އަހަރު މި ޝީލްޑް އުފުލާލާފައެވެ.
މި ސީޒަނުގައި ދެން އެންމެ އަވަހަށް ކުރިއަށްދާނީ ކަޕް ވިނާސް ކަޕްގެ މުބާރާތެވެ. އަދި އޭއެފްސީ ޗެލެންޖް ލީގުގައި މާޒިޔާ ވާދަކުރަން ޖެހޭތީ، ދިވެހި ޕްރިމިއާ ލީގުގެ މެޗުތައް ފެށުމަށް ތާވަލުކޮށްފައިވަނީ އަންނަ ސެޕްޓެމްބަރު މަހުގެ 10 ވަނަ ދުވަހުއެވެ.
