މާލީ އިދާރާތަކަށް ލައިސަންސް ދޫކުރާނީ ޤާނޫނީ އިޖުރާއަތްތައް ފުރިހަމަކުރުމުން ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން މިއަދު ވިދާޅުވެއްޖެއެވެ.
ބޭންކިންގ ލައިސަންސް ދޫކުރުމުގައި ޢަމަލުކުރާ އިޖުރާއަތުތަކާއި ގުޅޭގޮތުން މީޑިއާގައި ފެތުރެމުންދާ މަޢުލޫމާތުތަކާއި ގުޅިގެން އެމްއެމްއޭއިން ނެރުއްވި ބަޔާނުގައި ވިދާޅުވެފައިވަނީ، ރާއްޖޭގެ ބޭންކިންގއާއި ބެހޭ ޤާނޫނުގެ ދަށުން ބޭންކެއް ހިންގުމުގެ ލައިސަންސް ދޫކުރުމުގައި އެ އޮތޯރިޓީން ޢަމަލުކުރަނީ ތިން މަރުޙަލާއަކަށް ކަމަށެވެ. އެ ތިން މަރުޙަލާއަކީ:
- ލައިސަންސަށް އެދޭ ފަރާތަށް މަޢުލޫމާތު ފޯރުކޮށްދިނުން
- ހުށަހެޅުން ވަޒަންކުރުން
- ލައިސަންސް ދޫކުރުން
އެމްއެމްއޭއިން އިތުރަށް ވިދާޅުވެފައިވަނީ، ލައިސަންސަށް އެދި ހުށަހަޅާ ހުށަހެޅުން ވަޒަންކުރުމުގައި ބަލާ މައިގަނޑު ކަންތައްތަކުގެ ތެރޭގައި ހުށަހަޅާ ފަރާތުގެ މާލީ ޤާބިލުކަމާއި، ރައުސުމާލުގެ މަސްދަރު، ޙިއްސާދާރުންނާއި އިސް މެނޭޖްމަންޓްގެ ފިޓް އެންޑް ޕްރޮޕަރ އަދި ހުށަހަޅާފައިވާ ވިޔަފާރި ޕްލޭން ހިމެނޭ ކަމަށެވެ.
ލައިސަންސް ދޫކުރުމުގެ ކުރިން، އެމްއެމްއޭގެ ލައިސަންސިންގ ސެކްޝަނުން ހުށަހެޅުން ވަޒަންކުރުމަށްފަހު، އެ ހުށަހެޅުން ގެންދެވެނީ އެ އޮތޯރިޓީގެ އެޑްވައިޒަރީ ކޮމިޓީ އޮން ފައިނޭންޝަލް އިންސްޓިޓިއުޝަން ލައިސަންސިންގއަށް ކަމަށާއި، އެންމެ ފަހު ނިންމުން ނިންމަނީ އެމްއެމްއޭގެ ބޯޑުން ކަމަށް އެ އޮތޯރިޓީން ވިދާޅުވިއެވެ.
އެމްއެމްއޭއިން އިތުރަށް ވިދާޅުވެފައިވަނީ، ބޯޑުން ލައިސަންސް ދިނުމަށް ނިންމައިފިނަމަ، ލައިސަންސަށް އެދި ހުށަހެޅި ފަރާތަށް ފުރަތަމަ ދޫކުރަނީ "ކޮންޑިޝަނަލް" ހުއްދައެއް ކަމަށާއި، މި މުއްދަތުގައި ކުންފުނި ރަޖިސްޓްރީ ކުރުމަށާއި، އައިޓީ އިންފްރާސްޓްރަކްޗަރ ޤާއިމުކުރުމަށާއި، ތަން އޮޕަރޭޝަނަލައިޒްކުރުމަށް މުއްދަތެއް ދެވޭ ކަމަށެވެ.
މާލީ ދާއިރާ ހަރުދަނާކޮށް، މިދާއިރާއަކީ ނާޒާހަތްތެރިކަން ޤާއިމްވެފައިވާ ދާއިރާއެއްކަން ކަށަވަރުކުރުމަށް އެމްއެމްއޭއިން ދަނީ މަސައްކަތްކުރަމުންނެވެ.
އެމްއެމްއޭއިން އިތުރަށް ފާހަގަކުރައްވާފައިވަނީ، ބޯޑުން ލައިސަންސް ދޫނުކުރުމަށް ނިންމި ނަމަވެސް، ކޫލިންގ އޯފް ޕީރިއަޑެއް ޤާނޫނުން ލާޒިމުނުކުރާތީ، އަލުން ލައިސަންސަށް އެދި ހުށަހެޅުމުގެ ފުރުޞަތު އޮންނަ ކަމަށެވެ. އަދި އެފަދަ ހުށަހެޅުމެއް ލިބުމުން، އައު އެޕްލިކޭޝަނެއްގެ ގޮތުގައި އަލުން މުޅި އިވެލުއޭޝަން މަރުޙަލާ ހިންގޭނެކަމަށްވެސް އެމްއެމްއޭއިން ވިދާޅުވިއެވެ.
