ފަތުރުވެރިކަމާއި ތިމާވެއްޓާ ބެހޭ ވުޒާރާއިން ހާމަކުރި ގޮތުގައި، ސްރީލަންކާ ސަރުކާރުން ރާއްޖެއަށް ހަދިޔާކުރި ހައިވަކަރު ގަސްތައް ރިސޯޓުތަކަށް ބެހުމުގެ މަސައްކަތް ފަށައިފިއެވެ.

މި ގަސްތަކަކީ ރައީސް މުޢިއްޒު ފައްޓަވާފައިވާ "5 މިލިއަން ގަސް" އިންދުމުގެ ޕްރޮގްރާމުގެ ދަށުން، ރާއްޖޭގައި މަދުވެފައިވާ ހައިވަކަރު ގަސް އިތުރުކުރުމަށް ސްރީލަންކާ ސަރުކާރުން ހަދިޔާކޮށްފައިވާ ގަސްތަކެކެވެ.

ވުޒާރާއިން މަޢުލޫމާތު ދިން ގޮތުގައި، މި ގަސްތަކުގެ ފުރަތަމަ ޝިޕްމަންޓް ލިބުމާއެކު، ރާއްޖޭގެ ހުރިހާ އެއަރޕޯޓެއްގައި އިންދުމަށް ގަސް ފޮނުވާފައިވެއެވެ. މިހާރު ކުރިއަށްދަނީ ހައިވަކަރު ގަސް ބޭނުންވެގެން ޝައުޤުވެރިކަން ފާޅުކުރި ރިސޯޓުތަކަށް ގަސްތައް ހަދިޔާކުރުމުގެ މަސައްކަތެވެ.

ދުނިޔޭގެ ތިމާވެށީގެ ދުވަހާއި ގުޅުވައިގެން، ރާއްޖޭގެ އެކި ކަންކޮޅުތަކުގައި ގަސް އިންދުމުގެ އެކި ހަރަކާތްތައް ކުރިއަށް ގެންދިއުމަށް ވެސް ވަނީ ހަމަޖެހިފައެވެ. މިގޮތުން މ. އަތޮޅު، ރ. އަތޮޅު އަދި ށ. އަތޮޅުގައި މި ހިނގާ ޖޫން މަހުގެ ތެރޭގައި ގަސް އިންދުމުގެ ޕްރޮގްރާމްތަކެއް ހިންގުމަށް ހަމަޖެހިފައިވާ ކަމަށް ވުޒާރާއިން ބުނެފައިވެއެވެ.

ވުޒާރާއިން އިތުރަށް ހާމަކުރި ގޮތުގައި، ފަސް މިލިއަން ގަސް އިންދުމުގެ ޕްރޮގްރާމުގެ ދަށުން މިހާތަނަށް 565,000 ގަސް ވަނީ އިންދާފައެވެ. މި ޕްރޮގްރާމުގެ މަޤްޞަދަކީ ރާއްޖޭގެ ހުރިހާ ރަށެއްގެ މަލަމަތި ޒީނަތްތެރިކުރުމެވެ.

މި މަޝްރޫޢު ކުރިއަށް ގެންދިއުމުގައި ދެމުންދާ އެއްބާރުލުމަށްޓަކައި ރިސޯޓުތަކަށް ވުޒާރާއިން ޝުކުރު އަދާކޮށްފައިވެއެވެ. ފަސް މިލިއަން ގަސް ޕްރޮގްރާމަކީ ރާއްޖޭގެ ތިމާވެށި ރައްކާތެރިކުރުމަށާއި، ގްރީން ކަވަރ އިތުރުކުރުމަށް އަމާޒުކޮށްގެން ކުރިއަށްގެންދާ މުހިންމު މަޝްރޫޢެކެވެ.