ވިލިމާލޭގައި މަސައްކަތްކުރަމުންދިޔަ ބަންގްލަދޭޝް ރައްޔިތަކު، ގައުމަށް އަނބުރާ ފޮނުވާލަން ވެލާނާ އިންޓަނޭޝަނަލް އެއާޕޯޓަށް ގެންދިޔުމަށްފަހު، އެއާޕޯޓުން ފިލައިފިއެވެ. މި މީހާގެ ގައިގައި ގައިން ގަޔަށް އަރާ ނުރައްކާތެރި ބައްޔެއް ހުރިކަން ފާހަގަކުރެވިފައިވާކަމަށް އޭނާގެ ވެރިފަރާތުން މައުލޫމާތު ދީފައިވެއެވެ.

ފިލައިގެން އުޅޭ މީހާއަކީ ބަންގްލަދޭޝްގެ 31 އަހަރުގެ ރާހުލް އަމީން ކަމަށާއި، އޭނާއަކީ ވިލިނގިލީގައި ކާޕެންޓްރީ މަސައްކަތް ކުރަމުން ދިޔަ ބިދޭސީއެއްކަމަށް އޭނާގެ ވެރިފަރާތް މުހައްމަދު ޝަރީފު ދުވަހު ނޫހަކަށް މައުލޫމާތު ދީފައިވެއެވެ.

ޝަރީފު ވިދާޅުވެފައިވާ ގޮތުގައި، އެ ބިދޭސީ މީހާގެ ވިސާގެ މުއްދަތު ހަމަވުމާއި ގުޅިގެން ވިސާ އައުކުރުމަށް ހެދި މެޑިކަލް ޗެކަޕުން އޭނާގެ ގައިގައި ގައިންގަޔަށް އަރާ ނުރައްކާތެރި ބައްޔެއް ހުރިކަމަށް އެޗްޕީއޭއިން އަންގާފައިވެއެވެ. މިކަން އެނގުމާއެކު ރާހުލް ފަރުވާއަށް ބަންގްލަދޭޝްއަށް ފޮނުވާލުމަށްޓަކައި އޭނާ ވިލިމާލެއިން އެއާޕޯޓަށް ދާ ފެރީއަށް އެރުވި ކަމަށްވެސް ޝަރީފު ވިދާޅުވިއެވެ.

"ވިސާ ހަދަން މެޑިކަލް ޗެކަޕް ހަދާނެތާ، މެޑިކަލް ހެދިއިރު މީނަގެ ކޮންމެވެސް ކޮމިނިކަބަލް ޑިސީސެއް ހުރި ކަމަށް އެޗްޕީއޭއިން އަހަރެމެންނަށް ރިޕޯޓްކުރި. އެގޮތަށް އެންގީމާ ދެން އަހަރެމެން ބޭނުންވީ އަވަހަށް މީނާ ފުރުވާލަން. ފުރުވާލަންވެގެން ޓިކެޓް ނަގާފައި ވިލިނގިލީ ފެރީން އެއާޕޯޓަށް ނުގޮސް މީނާ ފިލައިފި،" ޝަރީފު ވިދާޅުވިއެވެ.

ރާހުލް އަމީން ގެއްލިފައިވަނީ މެއި 26 ވަނަ ދުވަހުގެ ރޭ 9:30 ހާއިރުއެވެ. މި މީހާގެ އެއްވެސް ޚަބަރެއް ނުވަތަ މައުލޫމާތެއް ލިބިއްޖެނަމަ ވީހާވެސް އަވަހަކަށް 7478833 އަށް ގުޅުމަށް ޝަރީފު ވަނީ އެދިފައެވެ.