މާލޭގެ އުސް އިމާރާތަކުން ފުރާޅެއްގެ މައްޗަށް ވެއްޓި، އަނިޔާވި ހައްވާ ޔުމްނު ރަޝީދުހެ މައްސަލައިގެ ހަޤީޤަތް ހޯދުމަށް އެކުލަވާލި ރިޔާސީ ކޮމިޝަނުގެ މަސައްކަތް ނިމެން ކައިރިވެފައިވާ ކަމަށް އެ ކޮމިޝަނުން ހާމަކޮށްފިއެވެ.
ކޮމިޝަނުން އެކްސްގައި ކުރި ޕޯސްޓެއްގައި ބުނެފައިވަނީ ކޮމިޝަނުގެ ތަޙުޤީޤު ރިޕޯޓު ގާތްގަނޑަކަށް ދެ ހަފުތާއެއްހާ ދުވަހުގެ ތެރޭގައި ރައީސް މުޙައްމަދު މުޢިއްޒަށް ހަވާލުކުރާނެ ކަމަށެވެ.
މި ކޮމިޝަނުގެ ރައީސަކީ ކުރީގެ ބަންޑާރަ ނައިބު ޑރ. މުޙައްމަދު މުނައްވަރެވެ. ކޮމިޝަނުގައި ހިމެނެނީ ބްރިގޭޑިއަރ ޖެނެރަލް (ރިޓަޔަރޑް) އަޙްމަދު މުޙައްމަދު، ޑރ. މޫސާ މުރާދު، ކްލިނިކަލް ނަރުސް ޖަބީން މުޙައްމަދު އަދި ފެމިލީ ޕްރޮޓެކްޝަން އޮތޯރިޓީގެ އިސްވެރިއެއް ކަމަށްވާ އާމިނަތު އީނާސްއެވެ.
މައްސަލައިގެ ތަޙްޤީޤު ފުޅާކުރުމަށް އެ ކޮމިޝަނުން ޚާއްޞަ ޕޯޓަލް އެއް ވެސް ތަޢާރަފް ކުރިކަން ފާހަގަ ކުރެވެއެވެ.
ރައީސް ޑރ. މުޢިއްޒު މި ކޮމިޝަން އުފެއްދެވީ ޔުމްނުގެ މައްސަލައިގައި ފުލުހުން ހިންގަމުންދާ ތަޙުޤީޤާއި މެދު އާންމުންގެ ހިތްހަމަނުޖެހުން ބޮޑުވެ، އިންސާފަށް އެދި މުޒާހަރާތަކެއް ފެށުމާއި ގުޅިގެންނެވެ. ކޮމިޝަނުގެ މަސްއޫލިއްޔަތުތަކުގެ ތެރޭގައި މައްސަލައިގެ ހަޤީޤަތް ހޯދުމާއި، ފުލުހުންގެ ތަޙުޤީޤު ހިންގާފައިވަނީ ރަނގަޅަށްތޯ ބެލުން ހިމެނެއެވެ.
މި މައްސަލައިގައި އާންމުންގެ އެންމެ ބޮޑު ކަންބޮޑުވުމަކީ ފުލުހުން ދީފައިވާ މަޢުލޫމާތުތައް ދިމާނުވުމާއި، ތުހުމަތުކުރެވޭ ފަރާތްތަކާމެދު އާންމު އުސޫލާއި ޚިލާފަށް ލުއި ގޮތަކަށް ޢަމަލުކޮށްފައިވާ ކަމަށް ތުހުމަތުކުރެވުމެވެ.
އެނގިފައިވާ ގޮތުގައި ޔުމްނު ވެއްޓިފައިވަނީ މަސްތުވާ ތަކެތި ބޭނުންކުރުމުގެ ސަބަބުން ހަމަބުއްދި ފިލާފައިވާ ދަނޑިވަޅެއްގައެވެ. މިހާތަނަށް ކުރި ތަޙްޤީޤުން އޭނާ ވެއްޓުމުގައި އެހެން މީހެއްގެ ބައިވެރިވުމެއް ނެތެވެ.
