ސޫދާންގައި ކޮލެރާ ބަލި ހަލުވިކަމާއެކު ފެތުރެމުންދާ ކަމަށާއި، ފާއިތުވި ހަފުތާއެއްހާ ދުވަހުގެ ތެރޭގައި އެ ބަލީގައި 172 މީހުން މަރުވެފައިވާ ކަމަށް އެ ޤައުމުގެ ޞިއްޙަތާ ބެހޭ ވުޒާރާއިން ހާމަކޮށްފިއެވެ. މި މުއްދަތުގައި ބަލި ޖެހިފައިވާ 2,700 މީހުން ދެނެގަނެވިފައިވާ ކަމަށްވެސް އެ ވުޒާރާއިން ބުންޏެވެ.
ބަލި އެންމެ ހަލުވިކަމާއެކު ފެތުރެމުންދަނީ ވެރިރަށް ޚަރްތޫމްގައި ކަމަށާއި، ބަލި ޖެހިފައިވާ މީހުންގެ ތެރެއިން 90 އިންސައްތައަކީ ޚަރްތޫމްގެ ރައްޔިތުން ކަމަށް ޞިއްޙަތާ ބެހޭ ވުޒާރާއިން ބުންޏެވެ.
މި ނުރައްކާތެރި ބަލި ފެތުރެމުންދަނީ ސޫދާންގެ އަސްކަރިއްޔާއާއި ރެޕިޑް ސަޕޯޓް ފޯސަސް (އާރްއެސްއެފް) އާއި ދެމެދު ހިނގަމުންދާ އަހުލީ ހަނގުރާމައިގެ ތެރޭގައެވެ. މި ހަނގުރާމަ ފެށިފައިވަނީ 2023 ވަނަ އަހަރުގެ އޭޕްރީލް މަހުއެވެ.
ޞިއްޙަތާ ބެހޭ ވުޒާރާއިން ބުނި ގޮތުގައި، އާރްއެސްއެފުން ވަނީ ޚަރްތޫމްގެ ކަރަންޓާއި ސާފު ބޯފެން ފޯރުކޮށްދޭ މަރުކަޒުތަކަށް ޙަމަލާދީފައެވެ. މީގެ ސަބަބުން ވެރިރަށުގެ ރައްޔިތުންނަށް ކަރަންޓާއި ސާފު ބޯފެން ލިބޭނެ މަގުތައް ވަނީ ބަންދުވެފައެވެ. ޚަރްތޫމްގެ އިތުރުން ޤައުމުގެ ދެކުނާއި މެދުތެރެ އަދި އުތުރުގެ ސަރަޙައްދުތަކުގައިވެސް ކޮލެރާ ފެތުރެމުންދާ ކަމަށް އެ ވުޒާރާއިން ހާމަކުރިއެވެ.
ކޮލެރާއަކީ ސޫދާންގައި ޢާންމުކޮށް ފެތުރެމުންދާ ބައްޔެއް ނަމަވެސް، އަހުލީ ހަނގުރާމަ ފެށުމާއެކު މި ބަލި ފެތުރުން އިތުރުވެ، ނުރައްކާތެރި ހާލަތަކަށް ވެއްޓިފައިވާ ކަމަށް ޞިއްޙަތާ ބެހޭ ވުޒާރާޒާރާއިން ފާހަގަކުރިއެވެ. ހަނގުރާމައިގެ ސަބަބުން ޤައުމުގެ ފެނާއި ނަރުދަމާގެ ނިޒާމަށް ބޮޑެތި ގެއްލުންތަކެއް ލިބިފައިވާ ކަމަށްވެސް އެ ވުޒާރާއިން ބުންޏެވެ.
އަހުލީ ހަނގުރާމައިގެ ސަބަބުން ސޫދާންގެ ޞިއްޙީ ނިޒާމު ބަލިކަށިވެފަިވާ ކަމަށާއި އަދި ހަނގުރާމައިގެ ސަބަބުން ޤައުމުގެ ހަސްފަތާލުތަކުގެ ތެރެއިން 90 އިންސައްތަ ބައެއް ހާލަތްތަކުގައި ބަންދުކުރަން މަޖުބޫރުވެފައިވާ ކަމަށް ދުނިޔޭގެ ޞިއްޙަތު ޖަމްޢިއްޔާ (ޑަބްލިޔުއެޗްއޯ)އިން ހާމަކުރިއެވެ.
ކޮލެރާއަކީ ތަޣައްޔަރުވެފައިވާ ފެނާއި ކާބޯތަކެތީގެ ޒަރީޢާއިން ފެތުރޭ ނުރައްކާތެރި ބައްޔެކެވެ. އަދި ވަގުތުން ޞިއްޙީ ފަރުވާ ނުދެވިއްޖެނަމަ ފުރާނައަށް ނުރައްކާވުމުގެ ފުރުޞަތު އޮތް ބައްޔެކެވެ. ނަމަވެސް، ސާފު ބޯފެނާއި ނަރުދަމާގެ ޚިދުމަތްތައް ޤާއިމުކޮށް، އެކަށީގެންވާ ބޭސްފަރުވާ ލިބިއްޖެނަމަ މި ބަލި ކޮންޓްރޯލްކުރެވިދާނެއެވެ.
