ސޫދާނުގައި ހިނގަމުންދާ ބިރުވެރި ޤަތުލުޢާންމުގައި މިހާތަން 40،000 އަށް ވުރެ ގިނަ މުސްލިމުންގެ ފުރާނަ ގެއްލިފައި ވާއިރު، ގިނަ މީހުންގެ ޖަނާޒާ ބާއްވާފައި ވަނީ ޢާންމުކޮށް ކަންކުރާ އުޞޫލާއި ޚިލާފަށް ކަމަށާއި ސަހަރާއަށް ވަޅުލާން ނުގެންދެވިގެން، ވަޅުލާނެ ތަނެއް ނެތުމުން އެތައް ސަތޭކަ ބަޔަކު ވަޅުލާފައި ވަނީ މަގުތަކާއި ޕާކުތަކާއި ކޯރުތަކުގެ އައްސޭރީގައި ކަމަށް ސޫދާނާއި ގުޅުން ހުރި އިތުބާރު ހުރި މަސްދަރަކުން ބުނެފިއެވެ.
ސޫދާނުގެ މަގުތަކުންނާއި ސިޓީތަކުގެ ބޭރުން ވެސް ގިނަ ޢަދަދެއްގެ ގަބުރުތައް ފެނިފައިވާ ކަމަށް ބައިނަލްއަޤްވާމީ ޖަމާޢަތްތަކުން ވެސް ވަނީ ބުނެފައެވެ.
މިވަގުތު އެންމެ ބޮޑަށް ޙަމަލާތައް ދެމުން ދަނީ ހުޅަނގު ދާރްފޫރް ގެ އަލް ޖަނީނާގައެވެ. ޚަބަރު ލިބޭ ގޮތުގައި ސަހަރާގައި ވަޅުލެވޭނެ ގޮތެއް ނެތިގެން އެތައް ބަޔަކު އަލް ޖަނީންގެ އެކި ހިސާބުތަކުގައި ވަޅުލާފައި ވެއެވެ. އޭގެތެރެއިން 87 މީހުން ވަޅުލާފައިވާ ކަށްވަޅެއް ފެނިފައިވާ ކަމަށް އދ. އިން ވެސް ކަށަވަރު ކުރެއެވެ.
Advertisement
މީގެ އިތުރުން އުއްމު ދުރްމާންގެ ދެކުނުގެ އެކި ހިސާބުތަކުން ވެސް 465 މީހުންގެ ހަށިގަނޑު ވަޅުލާފައި ވަނިކޮށް ވަނީ ފެނިފައެވެ. މީހުން ވަޅުލާފައި ވަނީ ފުނިފުންޏަށެވެ. ބައެއް ކަށްވަޅުތަކުން 27 އަށް ވުރެ ގިނަ ގަބުރު ފެނިފައިވާ ކަމަށް އިތުބާރު ހުރި މަސްދަރުތަކާއި ޙަވާލާދީ ރިޕޯޓްތައް ބުނެ އެވެ.
ސޫދާނުގެ ސަރުކާރުން ބުނީ އަލް ޚަރްޠޫމްގެ އެކި ތަންތަނުން ވެސް ގާތްގަނޑަކަށް 117 ކަށްވަޅު ފެނިގައިވާ ކަމަށެވެ. އޭގެތެރޭގައި ގޭގެއާއި މަގުތަކާއި ޕާކުތައް ހިމެނެއެވެ.
ސޫދާނުގައި އަހުލީ ހަނގުރާމަ ފެށުނީ 2023 ވަނަ އަހަރުގެ އޭޕްރީލް މަހު ސޫދާނުގެ ސިފައިންނާއި ރެޕިޑް ސަޕޯޓް ފޯސަސް (އާރުއެސްއެފް) އާއި ދެމެދު ބާރުތައް ބެހުމުގައި ޚިޔާލު ތަފާތުވެގެން ހިނގި ކޯޅުންތަކާއި އެކުއެވެ. ހަނގުރާމަ ފެށުމުގެ ކުރިން އާރުއެސްއެފް އަކީ ސޫދާނުގެ އަސްކަރިއްޔާ އާއި އެކުގައި ޤައުމުގެ ވަޞީލަތްތައް ޙިމާޔަތްކޮށް ބެލެހެއްޓުމުގައި މަސައްކަތްކުރި ޖަމާޢަތެކެވެ. ނަމަވެސް ފަހުން ސޫދާން ސަރުކާރުން ބޭނުންވީ އާރްއެސްއެފް އަކީ ސިފައިންގެ ދަށުން މަސައްކަތްކުރާ ބަޔަކަށް ހެދުމަށެވެ. މިއާއި އެކު ކޯޅުންތައް ބޮޑުވެ އާރްއެސްއެފުން ނިންމީ ސިފައިންނަށް އެހީތެރިކަން ފޯރުކޮށްދިނުމުގެ ބަދަލުގައި ޤައުމުގެ ވެރިކަމެވެ. އެއާއި އެކު 2023ވަނަ އަހަރުގެ އޭޕްރިލް މަހުގެ 15ވަނަ ދުވަހު އާރްއެސްއެފްގެ ފައުޖުން ވެރިރަށް ޚަރްޠޫމަށް އަރައި، އެ ރަށުގެ މުހިންމު ސަރަޙައްދުތަކަށް އަތްގަދަ ކުރަން ފެށިއެވެ.
