ސޫދާނުގެ ހަމަނުޖެހުންތަކުގެ ސަބަބުން އަނިޔާވެ، ގެދޮރު ގެއްލިފައިވާ ޢާއިލާއެއް ބެޑްޝީޓް ފޮތިން ޓެންޓެއް ހަދައި ހިޔާވަހިކަން ހޯދައިގެން، އަނިޔާވެފައިވާ ތުއްތު ދަރިފުޅައެކު.
ސޫދާނުގެ ދާޚިލީ ހަނގުރާމައިގައި 40،000 އަށް ވުރެ ގިނަ މީހުން މަރުވެ، 12 މިލިއަނަށް ވުރެ ގިނަ މީހުން ގެދޮރު ދޫކޮށްފައިވާ ކަމަށް ޔުނައިޓެޑް ނޭޝަންސް ގެ އެންމެ ފަހުގެ އަންދާޒާތަކުން ދައްކަ އެވެ. މިހާރު ތިންވަނަ އަހަރަށް ވެފައިވާ މި އަނިޔާވެރި ހަނގުރާމައިގެ ސަބަބުން އެފްރިކާގެ އެންމެ ބޮޑު އެއް ޤައުމު އިންތިހާ އަށް ބޮޑު އިންސާނީ މުސީބާތަކަށް މި ވަނީ ބަދަލުވެފައެވެ. އެތައް މިލިއަން މުސްލިމުންނަށް ކުރިމަތިވެފައިވަނީ ބަނޑުހައިހޫނުކަމާއި، ތަފާތު ވައްތަރުތަކުގެ ބަލި ފެތުރުމާއެވެ. ޞިއްޙީ ފަރުވާ އާއި ޞިއްޙީ ނިޒާމު ފުނޑުފުނޑުވެ ތަޢުލީމީ ނިޒާމު ވެސް ފުނޑިއްޖެއެވެ.
Advertisement
ވާދަވެރި އަސްކަރީ ބާރުތަކުގެ މެދުގައި ހަމަނުޖެހުންތައް ކުރިއަށްދާއިރު ސޫދާނުގެ ގެތައް އެ ދަނީ ދެވަނަ ޣައްޒާ އަށް ވަމުންނެވެ. ސިޓީ ސަރަޙައްދުތަކުގައި ތާށި ވެފައި ތިބި ރައްޔިތުން އެ ދަނީ ބިރުވެރި ބަޑީގެ އުންޑަތަކާއި ބޮމުގެ އިތުރުން ފޭރުމާއި، ޖިންސީ އަނިޔާތަކާއި ރޭޕް ކުރުމާއި ކުރިމަތިލަމުންނެވެ.
ސޫދާނުގެ މަގުމަތީގައި ބަޑިޖަހައި މަރާލާފައިވާ ބަޔަކު ވެއްޓިފައި ތިބިއިރު އެމީހުންގެ ކައިރީގައި ބަޔަކު ހުއްޓިލައިގެން.
މި އަޑު ބަޔަކަށް އިވޭހެއްޔެވެ؟ ބައިނަލްއަޤްވާމީ ފަރާތްތަކުން އިންޒާރު ދެނީ ސޫދާން އޮތީ ބަނޑުހައިހޫނުކަމުގެ މަގުމަތީގައި ކަމަށެވެ. ހަނގުރާމަ ހުއްޓުވަން އދ އެ އޮތީ ނުކުޅުދިފައެވެ.
ސޫދާންގެ އަސްކަރިއްޔާ އާއި ދެކޮޅަށް ހަނގުރާމަ ކުރަމުންދާ ރެޕިޑް ސަޕޯޓް ފޯސަސް (އާރްއެސްއެފް)ގެ ހަނގުރާމަވެރިން، އެ ޤައުމުގެ ޢާންމު ރައްޔިތުންނާއި ދެކޮޅަށް ހަނގުރާމައިގެ ކުށްތަކާއި ޖަރީމާތައް ހިންގަން ފެށީ ޣައްޒާ ހަނގުރާމަ އަށްވުރެ ކުރިން، އޭޕްރީލް 2023 ގައެވެ. ޖެނެރަލް ޢަބްދުލް ފައްތާޙް އަލް ބުރުހާން އިސްކޮށް ހުންނަވައިގެން ސޫދާނުގެ ސިފައިން (އެސްއޭއެފް) އާއި މުޙައްމަދު ޙަމްދާން ދަގަލޯ (ހެމެދުތީ) ގެ ކޮމާންޑުގެ އާރުއެސްއެފް އާއި ދެމެދު މި އަހުލީހަނގުރާމަ ފެށިގެން ދިޔައީ، 2023ވަނަ އަހަރުގެ އޭޕްރިލް މަހުގެ 15ވަނަ ދުވަހު އާރްއެސްއެފްގެ ފައުޖުން ވެރިރަށް ޚަރްޠޫމަށް އަރައި، އެ ރަށުގެ މުހިންމު ސަރަޙައްދުތަކަށް އަތްގަދަ ކުރުމާއި އެކުގައެވެ.
40000 މުސްލިމުން ސޫދާނުން މަރާލާފައިވާ ކަމަށް އދ. އިން ބުނާއިރު ސޫދާނުގެ އެކި ފަރާތްތަކުން ބުނަނީ މަރުވި މީހުންގެ ޢަދަދު 50،000 ފަހަނައަޅައި ގޮސްފި ކަމަށެވެ. ކޮންމެޔަކަސް، މި ހަނގުރާމަ މިއަދު މިއޮތީ ބޮއްސުންލާފައެވެ. ދުނިޔޭގެ ބާރުގަދަ ޤައުމުތައް ވެސް ތިބީ ހިމޭނުންނެވެ.
