ސަޢުދީ އަރަބިއްޔާގެ އޯވަރސައިޓް އެންޑް އެންޓި-ކޮރަޕްޝަން އޮތޯރިޓީ، ނަޒާހާ އާއި ދިވެހިރާއްޖޭގެ އެންޓި-ކޮރަޕްޝަން ކޮމިޝަން (އޭސީސީ) ގުޅިގެން ފަތުރުވެރިކަމުގެ ދާއިރާގައި ނަޒާހަތްތެރިކަން ހަރުދަނާކޮށް ކޮރަޕްޝަން ހުއްޓުވުމާގުޅޭ ހައި-ލެވެލް ޕްރިންސިޕަލްތަކެއް އެކުލަވާލައި، އޯގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ) އަށް ހުށަހެޅުމަށް ނިންމައިފިއެވެ.

މި ޕްރިންސިޕަލްތަކަށް އެއްބަސްވެފައިވަނީ މި މަހުގެ 6 އިން 7 އަށް ބޭއްވުނު "ސަޢުދީ-މޯލްޑިވްސް އިންޓަރނޭޝަނަލް ފޯރަމް އޮން އިންޓަގްރިޓީ 2025" ގައެވެ. މި ޕްރިންސިޕަލްތައް ހުށަހަޅާނީ އޯއައިސީގެ "މިނިސްޓީރިއަލް މީޓިންގ އޮފް އެންޓި-ކޮރަޕްޝަން އެންޑް ލޯ އެންފޯސްމެންޓް އެޖެންސީސް" އަށެވެ.

މި ހައި-ލެވެލް ޕްރިންސިޕަލްތަކަކީ، ފަތުރުވެރިކަމުގެ ޙަރަކާތްތަކުގައި ނަޒާހަތްތެރިކަމާއި، ހާމަކަމާއި، ޖަވާބުދާރީވުން އިތުރުކުރުމަށް އޯއައިސީ ޤައުމުތަކަށް އެހީތެރިވުމަށް ފަރުމާކުރެވިފައިވާ އޮނިގަނޑެކެވެ. މި ޕްރިންސިޕަލްތައް ބިނާކޮށްފައިވަނީ އިސްލާމީ އަދި ބައިނަލްއަޤްވާމީ މިންގަނޑުތަކުގެ މައްޗަށެވެ. އަދި އދ.ގެ ކޮރަޕްޝަން ހުއްޓުވުމުގެ މުޢާހަދާ އާއި ދެމެހެއްޓެނިވި ތަރައްޤީގެ ލަނޑުދަނޑިތައް ވެސް މީގައި ހިމެނެއެވެ.

މި ޕްރިންސިޕަލްތަކުގައި ހިމެނޭ މުހިންމު ކަންތައްތަކުގެ ތެރޭގައި ކޮރަޕްޝަން ހުއްޓުވުމަށް ޤާނޫނީ އޮނިގަނޑު ހަރުދަނާ ކުރުމާއި، ބައިނަލްއަޤްވާމީ އެއްބާރުލުން ވަރުގަދަކުރުމާއި، ޓެކްނޮލޮޖީ ބޭނުންކޮށްގެން ހާމަކަން އިތުރުކުރުމާއި، ފަތުރުވެރިކަމުގެ މަޝްރޫޢުތަކުގައި ނަޒާހަތްތެރިކަން އިތުރުކުރުން ހިމެނެއެވެ. މީގެ އިތުރުން، ދެމެހެއްޓެނިވި ފަތުރުވެރިކަމަށް އެއްބާރުލުން ދިނުމާއި، ޕަބްލިކް-ޕްރައިވެޓް ޕާޓްނަރޝިޕްތަކުގެ ނަޒާހަތްތެރިކަން ކުރިއެރުވުމާއި، އެންޓި-ކޮރަޕްޝަން އޮނިގަނޑުތައް މޮނިޓަރކޮށް އިވެލުއޭޓްކުރުމާއި، މަޢުލޫމާތު ލިބުމުގެ ފުރުސަތު އިތުރުކުރުމާއި، ވިސްލްބްލޯވަރުން ހިމާޔަތްކުރުން ފަދަ ކަންކަން ހިމެނެއެވެ.

އޭސީސީން ބުނާ ގޮތުގައި މި ހަމަތަކުގެ މައިގަނޑު މަޤްޞަދަކީ އޯއައިސީގެ މެމްބަރު ޤައުމުތަކުގެ ފަތުރުވެރިކަމުގެ ދާއިރާގައި ހުރި ކޮރަޕްޝަންގެ ގޮންޖެހުންތައް ނައްތާލުމާއި، ދެމިގެންދާނެ، ހަމަހަމަ އުޞޫލުތަކެއް ޤާއިމުކުރުމެވެ.